Paşinyandan Zəngəzur dəhlizi ilə bağlı etiraf: Rusiyanın əlində naçar qalmışıq

Ermənistanın Baş naziri Nikol Paşinyan hesab edir ki, Ermənistan Dəmir Yolları Rusiyanın nəzarəti altında olduğu üçün ölkə regional dəmir yolu əlaqələrinin inkişafında rəqabət üstünlüklərini itirməklə üzləşir.

Publika.az xəbər verir ki, hökumət başçısı bunu İctimai Televiziyaya verdiyi müsahibədə ölkədə dəmir yolu infrastrukturunun bərpası və inkişafı ilə bağlı sualı cavablandırarkən bildirib.

Paşinyan xatırladıb ki, Ermənistan tərəfi əvvəllər Yerasx-Azərbaycan sərhədi (Naxçıvan) marşrutu, eləcə də Axurik-Türkiyə sərhədi hissəsi boyunca dəmir yolu xidmətinin bərpası ilə bağlı rusiyalı həmkarlarına müraciət etmişdi.

Baş nazir qeyd edib ki, "Gərgin beynəlxalq vəziyyət və Ermənistan dəmir yolunun Rusiya Dəmir Yollarının nəzarəti altında olması nəzərə alınmaqla, burada rəqabət üstünlüyümüzü itirdiyimizi hiss edirik. Nə edəcəyimizi düşünməliyik, çünki bu, bir, iki, üç və ya dörd ilin məsələsi deyil. Dostluq, qardaşlıq çərçivəsində həll yolu tapmalıyıq".

Onun sözlərinə görə, əsas məsələlərdən biri regionda gələcək dəmir yolu marşrutlarının konfiqurasiyasıdır. Ermənistan tərəfi hesab edir ki, daha optimal və rəqabətli bir seçim Zəngilandan dəmir yolunun Meğridən keçməsi və oradan Naxçıvana (Ermənistan ərazisindən) keçməsidir.

Paşinyanın sözlərinə görə, Rusiya Dəmir Yollarının Ermənistan dəmir yolunu idarə etməsi Türkiyə və Azərbaycanın 2025-ci ilin avqust ayında Qars-İğdır-Aralık-Dilucə adlı yeni dəmir yolu xəttinin tikintisi barədə qərar verməsinə səbəb olan amillərdən biri olub. Bu xətt Türkiyə ərazisindən keçir və Naxçıvana aparır (oradan sonradan "Tramp marşrutu" vasitəsilə Azərbaycana birləşəcək).

Hökumət başçısı bildirib ki, şəxsən bu məsələni Azərbaycan və Türkiyə prezidentləri ilə görüşlərdə qaldırıb, Ermənistanda hazır dəmir yolu infrastrukturunun mövcudluğuna işarə edib, lakin cavab olaraq diplomatik sükutla qarşılanıb.

Paşinyan izah edib ki, Türkiyə marşrutu sıfırdan dəmir yolunun tikintisini tələb edir, halbuki Ermənistanda mövcud infrastruktur artıq mövcuddur: Yerasxda cəmi bir neçə kilometr, Axurikdə isə daha az dəmir yolu yoxdur.

"Mövcud marşrutun modernləşdirilməsi və müasir tələblərə uyğunlaşdırılması üçün cəmi bir neçə milyon dollar investisiya tələb olunacaq. Qısa hissələrin bərpası heç bir əhəmiyyətli maliyyə və ya texniki çətinlik yaratmır", - deyə o vurğulayıb.

Eyni zamanda, Baş nazir qeyd edib ki, beynəlxalq aləmdə Ermənistandan keçən dəmir yolu marşrutu getdikcə "Rusiya" kimi təqdim olunur ki, bu da geosiyasi gərginliklər fonunda onun rəqabət qabiliyyətini daha da azaldır.

Tural