FHN-in Dövlət Yanğından Mühafizə Xidməti təlim keçirdi - VİDEO

Fövqəladə Hallar Nazirliyinin Dövlət Yanğından Mühafizə Xidmətinin (DYMX) təşkilatçılığı ilə Sumqayıt şəhəri, 18-ci mikrorayon, M.Əsədov küçəsində, yerləşən “Qərb” şadlıq sarayında “Fövqəladə hallar zamanı baş verə biləcək yanğınların söndürülməsi və insanların təxliyyəsinin təşkili” mövzusunda yanğın-taktiki təlim keçirib.

Publika.az-ın xəbərinə görə, FHN-in müvafiq canlı qüvvə və texnikasının cəlb edildiyi təlimin keçirilməsində məqsəd “Qərb” şadlıq sarayının kollektivinə fövqəladə hallar, o cümlədən yanğın zamanı davranış qaydalarının aşılanması, habelə bu kimi obyektlərdə mümkün yanğınlar zamanı yanğından mühafizə bölmələrinin fəaliyyətinin daha da təkmilləşdirilməsi olub.

Təlim zamanı şərti yanğınla əlaqədar “Həyəcan” siqnalı verildikdən sonra baş vermiş şərti yanğın yerinə operativ çatan Dövlət Yanğından Mühafizə Xidmətinin yanğından mühafizə bölmələri işçilərin “təhlükəli ərazidən” təxliyə edilməsi, “yanğın” yerində çevik kəşfiyyatın aparılması və “yanğının söndürülməsi”, Nazirliyin Sumqayıt Regional Mərkəzinin xilasetmə qrupu isə ərazidən “yaralıların xilas edilməsi” əməliyyatlarını yerinə yetiriblər.

Təlimə DYMX-nin Sumqayıt şəhər Dövlət Yanğından Mühafizə İdarəsi və Sumqayıt Regional Mərkəzinin iştirakı ilə ümumilikdə 7 texnika və 38 nəfər şəxsi heyəti cəlb olunub.

Uğurla keçən təlimdən sonra əldə edilmiş nəticələr müzakirə olunub, müvafiq tapşırıqlar verilib.