Quru sərhədlər bağlıdır: Tbilisi–Bakı qatarına maraq yüksəlib

Tbilisidən Bakıya hərəkət edən qatara tələbat daha yüksəkdir. Bu da ölkə ərazisində quru sərhədlərin bağlı olması ilə əlaqədardır.

Publika.az xəbər verir ki, bu barədə "Azərbaycan Dəmir Yolları" (ADY) QSC-nin Sərnişin daşımaları departamentinin rəisi Azər Fərəcov jurnalistlərə açıqlamasında deyib.

O bildirib ki, xarici vətəndaşlar ölkəyə daxil olduqdan sonra digər nəqliyyat növlərindən də istifadə etməklə ölkəni tərk edə bilir, lakin ölkəyə daxil olmaq yalnız təyyarə və qatar yolu ilə olduğundan Tbilisi-Bakı istiqaməti üzrə daha çox tələbat var.

A.Fərəcov əlavə edib ki, mövsümlə əlaqədar olaraq biletlərdə endirimlərin tətbiq edilməsi hər hansı bir müzakirə aparılmır:

“Biletlər minimal qiymətlərlə satışa təqdim olunur”.

O həmçinin bildirib ki, köhnə tipli vaqonların yenilərə qoşulması ilə bağlı hər hansı bir risk və ya təhlükə yoxdur:

“Bu texniki istismar qaydalarına uyğundur və qoşulan vaqonlar həmin qatarın sürəti və funksionallığı ilə hərəkət edəcəklər”.