Əliyevdən Xankəndidəki ermənilərə çağırış - Bakı ən yüksək zəmanəti verir

Prezident İlham Əliyevin “Dünya bu gün: Çağırışlar və ümidlər” mövzusunda X Qlobal Bakı Forumunda çıxışında Qarabağ iqtisadi rayonunda yaşayan erməni əhalisinə müraciət hesab oluna biləcək məqamlar da var.

“Azərbaycandakı erməni azlığına gəldikdə, Azərbaycan çoxkonfessiyalı, çoxmillətli ölkədir. Azərbaycanda azlıqların hüquqları Konstitusiyamız tərəfindən qorunur. Azərbaycanda real vəziyyətlə tanış olan hər kəs deyə bilər ki, Azərbaycan yüksək dini və etnik dözümlülüyü ilə seçilən, müxtəlif etnik qrupların, konfessiyaların nümayəndələrinin dinc və ləyaqətli şəkildə yaşadığı ölkədir. Bir sözlə, əminəm ki, Azərbaycanın Qarabağ bölgəsində yaşayan ermənilərin həyatı işğal dövründən fərqli olaraq daha yaxşı olacaq”, - dövlət başçısı qeyd edib.

Prezident Qarabağdakı erməni əhali ilə bağlı zaman-zaman fikirlər səsləndirir, lakin indi səsləndirdiyi fikirlər son proseslər fonunda xüsusilə diqqət çəkir.

Bakı Qarabağdakı separatçıların qarşısında son şərtini irəli sürüb: ya Azərbaycana inteqrasiya edəcəklər, ya da daha sərt addımlar atılacaq.

Araik Arutyunyan və David Babayanın dedikləri təsdiq edir ki, Qarabağda erməni əhalisi arasında Azərbaycan vətəndaşı olmaq istəyən ermənilərin sayı artır. Lakin hazırda əsas problem separatçıların əhalini təhdid etməsi, prosesin qarşısını almaq cəhdidir. Bu baxımdan, rəsmi Bakının erməni əhalisinə zəmanətverici çağırışlarına ehtiyac var. Və bu, ən yüksək səviyyədə dilə gətirilir. Azərbaycan Prezidentinin beynəlxalq forumda səsləndirdiyi fikirlər erməni əhalisinə ən yüksək səviyyədə zəmanətin verilməsi hesab oluna bilər.

Azərbaycan rəhbərliyinin belə çıxışlarının erməni əhalisi arasında inteqrasiya meyllərini daha da artıracağı gözləniləndir.

Asif