Azərbaycanda 21 795 nəfər müəllim olmaq istəyir

Azərbaycanda ümumi təhsil müəssisələrinə və peşə liseylərinə müəllimlərin işə qəbulu üzrə elektron ərizə qəbulu başa çatıb.

Təhsil Nazirliyindən Publika.az-a verilən məlumata görə, müəllimlərin işə qəbulu üzrə elektron ərizələrin qəbulu iyulun 15-i saat 23:59-da başa çatıb. Ümumilikdə 24 437 nəfər elektron ərizə ilə müraciət edib, onlardan 21 795 nəfərinin ərizəsi qəbul olunub.

O qeyd edib ki, müsabiqəyə müraciət edənlərin böyük əksəriyyəti ibtidai sinif müəllimləri olub. İbtidai sinif müəllimliyi üzrə 6 440 nəfər (29.54%), Azərbaycan dili və ədəbiyyat üzrə 2,971 nəfər (13.63%), ingilis dili üzrə 2 354 nəfər (10.80%), riyaziyyat üzrə 1 916 nəfər (8.79%), tarix üzrə 1 260 nəfər (5.78%), informatika üzrə 1 152 nəfər (5.28%), fiziki tərbiyə üzrə 974 nəfər (4.46%), coğrafiya üzrə 954 nəfər (4.37%), biologiya üzrə 804 nəfər (3.68%), fizika üzrə 778 nəfər (3.56%), kimya üzrə 665 nəfər (3,05%), texnologiya üzrə 475 nəfər (2.17%), təsviri incəsənət üzrə 289 nəfər (1.32%), musiqi üzrə 211 nəfər (0.96%), rus dili üzrə 180 nəfər (0.82%), rus dili və ədəbiyyatı üzrə 151 nəfər (0.69%), fransız dili üzrə 118 nəfər (0.54%), alman dili üzrə 103 nəfər (0.47%) elektron ərizə verib.

Şöbə müdirinin sözlərinə görə, namizədlər tərəfindən ən çox seçilən vakant yerlər Bakı şəhəri (351 yer - 10.14%), Cəlilabad rayonu (202 yer - 5.83%), Laçın rayonu (180 yer - 5.20%), Quba rayonu (172 yer - 4.96%), Lerik rayonu (165 yer - 4.76%) üzrədir.

Elektron ərizəsi təsdiq olunanların böyük əksəriyyəti 35 yaşadək gənclər (19,911 nəfər, 91.36%) olub. Namizədlərin 1,661 nəfəri (7.62%) 35-50 yaş, 223 nəfəri (1.02%) 50-65 yaş aralığında olub.

Müəllimlərin işə qəbulu üzrə müsabiqənin test imtahanları 21-29 iyul 2015-ci il tarixlərdə aparılacaq. İmtahanlar Azərbaycan Dövlət İqtisad Universitetinin 2-ci tədris binasında (AZ1072, Bakı şəhəri, Nərimanov rayonu, Həsən Əliyev küçəsi 135) keçiriləcək.