“Azneft” Xəzəri çirkləndirir - Nazirlik

Azərbaycan Respublikası Dövlət Neft Şirkətinin (ARDNŞ) tərkibində olan “Azneft” İstehsalat Birliyinin “Neft Daşları” neft-qazçıxarma idarəsinin (NQÇİ) estakadayanı və ayrıca meydançalarında formalaşan məişət-fekal tullantı suları təmizlənmədən və zərərsizləşdirilmədən birbaşa Xəzər dənizinə axıdılır.

Publika.az xəbər verir ki, bu barədə Ekologiya və Təbii Sərvətlər Nazirliyinin (ETSN) Xəzər Kompleks Ekoloji Monitorinq İdarəsinin aylıq bülletenində bildirilib.

Bülletendə vurğulanır ki, dənizdən götürülən su yanğından mühafizə xətləri sistemində istifadə olunur. Bundan başqa burada texniki məqsədlər üçün də dəniz suyundan istifadə olunur. Lakin quyularda əsaslı təmir və quyuların yuyulması zamanı istifadə olunan dəniz suyunun hesabatı aparılmır. NQÇİ ərazisində yerləşən A2600 (HS) qurğusu vasitəsilə bərk məişət tullantıları (6,7 t/ay) yandırılır və tullantı qalıqları xüsusi konteynerlərdə saxlanılır. Qaradağ rayonunun Ümid, Səngəçal, Qobustan və Ələt qəsəbələrində kanalizasiya xətləri bərpa edilməzsə, sahilboyu ərazilərdə tullantı su gölməçələrinin artmasına, bataqlıqların əmələ gəlməsinə, eyni zamanda ekoloji vəziyyətin daha da gərginləşməsinə səbəb ola bilər.

“Keçirilən monitorinq zamanı NQÇİ-nin mədən ərazilərində ekoloji vəziyyətin qənaətbəxş olmaması müəyyən edilib. Ən çox ekoloji çirklənmə halı isə 1 və 2 saylı ilkin neftyığma məntəqələrində qeydə alınıb. İlkin neftyığma məntəqələrinin istismar müddəti bitdiyindən hazırda qəzalı vəziyyətdədirlər. Mədən ərazilərində hasil olunan maye 1 və 2 saylı ilkin neftyığma məntəqələrində toplanır. Toplanan mayedən ayrılmış lay suyu nasoslar vasitəsilə təyinatı üzrə vurulsa da, 1 saylı ilkin neftyığma məntəqəsində nasosdan axan lay suyunun birbaşa dənizə atılması faktı müşahidə olunub.

NQÇİ-nin 516 saylı meydançasındakı quyulara qazın nəqli (sıxılması) zamanı istifadə olunan nasoslardan atmosferə qazın sızması və meydançaların işlənmiş mühərrik yağları ilə çirklənməsi tərəfimizdən müşahidə edilib. NQÇİ-nin mədən sahələrində dənizin çirklənməsinin səbəblərindən biri də quyularda aparılan təmir işləridir. 2272 saylı quyuda aparılan təmir işləri zamanı formalaşan neftli mayenin birbaşa dənizə atıldığı monitorinq zamanı tərəfimizdən müşahidə edilib” - deyə, bülletendə bildirilib.

Gülxar