Yoluxma sürətlə artır: Qapanma olacaq?

“Gəlin, əvvəlcə son günlərin yoluxma statistikasına, rəqəmlərə diqqət yetirək. Bu qədər yoluxma müqabilində ölüm sayı virusun əvvəlki ştamlarına, analoqlarına nisbətən xeyli aşağıdır. Bütün bunlar onu göstərir ki, virusun yoluxma intensivliyi, yoluxma qabiliyyəti çox yüksəkdir, amma ölüm riski göstəriciləri bir xeyli aşağıdır”.

Bunu Publika.az-a açıqlamasında tibb elmləri doktoru, professor Adil Qeybulla son günlər yoluxma statistikasının xeyli artmasına münasibət bildirərkən deyib.

Həkimin fikrincə, nəzərə almaq lazımdır ki, ölənlərin sayının statistikasında əvvəlcə “delta” variantına yoluxan, uzun müddət reanimasiyada yatan xəstələrin adları yer alır:

“Bu kateqoriyadan olan ölüm hallarını çıxdıqda görərik ki, “omikron” ştamının ölüm göstəriciləri xeyli aşağıdır. Yaranmış vəziyyətdən çıxmaq üçün hər halda, biz dünya təcrübəsinə əl atmalıyıq. Hesab edirəm ki, “omikron” ştamı özünün pik nöqtəsinə çatandan sonra yoluxma sayında, eləcə də ölüm hallarında sürətlə eniş baş verəcək. Ayrı-ayrı ölkələrdə, məsələn, İngiltərədə, Almaniyada, hazırda Danimarkada həyat demək olar ki, öz axarında davam edir. Hər yer açıqdır. Qapanma yoxdur. Hətta Amerikanın özündə də sərt tədbirlərə getmək qərarı qəbul olunmayıb”.

Adil Qeybulla hesab edir ki, Azərbaycanda da sərt karantin qaydalarının tətbiqinə ehtiyac duyulmamalıdır:

“Sadəcə olaraq, qızdırması olan, özündə müəyyən simptomları hiss edən, vaksinasiya olunmayan şəxslərin kütləvi tədbirlərdə, toylarda, yaslarda iştirakı təmin edilməsin. Sadəcə olaraq müəyyən kriteriyalar çərçivəsində ictimai həyat davam etməlidir. Qapalı mühitə daxil olduqda əllərin dezinfeksiyası, tibbi maskadan istifadə, məsafənin gözlənilməsi yetərlidir. Sosial həyatı məhdudlaşdırmağı məqsədəuyğun saymıram”.