Ağdamda böyük işlər görülüb - MAG-ın regional direktoru

"Bu konfrans olduqca əhəmiyyətlidir. Konfrans vasitəsilə Azərbaycanda minatəmizləmə və minalarla bağlı son vəziyyəti öyrənəcəyik. Azərbaycan hökuməti tərəfindən minatəmizləmə ilə bağlı çox böyük həcmdə işlər görülüb. Burada bizim təşkilatlar və digər təşkilatlar tərəfindən Azərbaycana minatəmizləmə prosesində necə kömək edəcəyimizlə bağlı imkanları nəzərdən keçiririk".

Publika.az xəbər verir ki, bunu Minalar üzrə Konsultasiya Qrupunun (Mines Advisory Group) regional direktoru Adam Komarovski Humanitar Minatəmizləmə Fəaliyyəti və Dayanıqlı İnkişaf Məqsədləri mövzusunda keçirilən beynəlxalq konfransda bildirib.

O, Ağdama səfəri ilə bağlı təəssüratlarını da bölüşüb: "Ötən ilin aprel ayında Ağdamda olmuşam, bu il də oraya səfər etmək imkanım oldu. Orada minatəmizləmə ilə bağlı görülən işlərin həcmi məni heyrətləndirdi. Bu, 12 aylıq müddətdə həqiqətən görülmüş böyük işdir. Ağdamda aparılan yenidənqurma və infrastruktur layihələrinin həcmi məni valeh etdi. Biz şirkət olaraq 20 ANAMA əməkdaşına təlimlər keçirik. Şirkətimiz Horadizdə ANAMA-nın 20 supervayzeri və minatəmizləmə üzrə 2 beynəlxalq ekspert üçün təlim keçirir".