Sağlamlıq imkanları məhdud uşaqlar arasında yarışlar başlayır

Əmək və Əhalinin Sosial Müdafiəsi Nazirliyi (ƏƏSMN) tərəfindən gələn ay əlilliyi olan şəxslər və sağlamlıq imkanları məhdud uşaqlar arasında stolüstü idman növləri üzrə IV Ümumrespublika yarışlarının zona mərhələsinə start veriləcək.

Bu barədə Publika.az-a nazirliyin mətbuat xidmətindən məlumat verilib. Məlumatda bildirilir ki, respublikanın 10 zonasında təşkil olunacaq bu yarışlarda bütün bölgələrdən ümumilikdə min nəfərdən çox əlilliyi olan şəxs və sağlamlıq imkanları məhdud uşaq idmanın şahmat, dama, nərd, stolüstü tennis və armrestlinq üzrə qüvvələrini sınayacaqlar. Zona turnirlərində qalib gələnlər cari ilin noyabr ayında Bakı şəhərində keçiriləcək final mərhələsində iştirak hüququ qazanacaqlar. Azərbaycan Respublikası Gənclər və İdman Nazirliyi ilə əməkdaşlıq şəraitində təşkil olunan yarışları təcrübəli idman mütəxəssislərindən ibarət hakimlər heyəti idarə edəcək.

ƏƏSMN-nin “2014-cü il üçün əlillərin və sağlamlıq imkanları məhdud uşaqların sosial müdafiəsi və reabilitasiyası Proqramı»na uyğun olaraq təşkil edilən yarışların qaliblərinə mükafatların, habelə iştirakçılara həvəsləndirici mükafatların verilməsi nəzərdə tutulur.