İrəvandan Hakan Fidanın açıqlamasına cavab gəldi: Bütün regional tərəfdaşlara…

Ermənistan parlamentinin sədri Alen Simonyan Türkiyənin xarici işlər naziri Hakan Fidanın Ermənistanın daxili siyasi vəziyyəti və regional proseslərlə bağlı açıqlamalarına münasibət bildirib.

Publika.az xəbər verir ki, Fidan daha əvvəl bəyan etmişdi ki, Ermənistanda 2026-cı ilin iyun ayına təyin edilmiş parlament seçkiləri regional kommunikasiyaların yenidən açılması, Ermənistanın Türkiyə və Azərbaycanla münasibətlərinin normallaşması üçün mühüm əhəmiyyət kəsb edəcək. O, həmçinin qeyd edib ki, Ermənistanın baş naziri Nikol Paşinyan hazırda rəy sorğularında liderdir.

"Biz görürük ki, Ermənistanın baş naziri Nikol Paşinyan hazırda rəy sorğularında liderdir. Biz onun bu prosesdə oynadığı konstruktiv rolu dəstəkləyirik. Bu istiqamət davam etməlidir", - Türkiyənin xarici işlər naziri bildirib.

Bu bəyanatları şərh edən Simonyan Türkiyənin Ermənistanın daxili işlərinə qarışması və ya konkret siyasi qüvvələrə dəstək verməsi ilə bağlı iddiaları rədd edib. Onun sözlərinə görə, söhbət ictimai sülh tələbinə dəstək və regional əməkdaşlığın inkişafından gedir.

"Mən Türkiyənin xarici işlər nazirinə və Ermənistan cəmiyyətinin mühüm hissəsinin sülh və genişlənmiş ticari-iqtisadi əməkdaşlıq, o cümlədən TRIPP layihəsi çərçivəsində arzularını dəstəkləyən bütün regional tərəfdaşlara minnətdarlığımı bildirirəm", - Simonyan bildirib.

Tural