Region

Nur Pəhləvi Trampa təşəkkür etdi - İranda qalmaqal

2 Mart 2026 23:35

İranın son şahı Məhəmməd Rza Pəhləvinin nəvəsi, müxalif fiqur Rza Pəhləvinin qızı Nur Pəhləvinin sosial mediada atdığı addım İranda ciddi narazılıq və sərt reaksiyalar doğurub.

Publika.az xəbər verir ki, Nur Pəhləvi ABŞ prezidenti Donald Trampın rəsmi "X" hesabında İranın ali dini lideri Əli Xameneinin öldürülməsi ilə bağlı paylaşdığı məlumatın altına “Çox sağ ol!” (“Thank you!”) şərhini yazıb. Qısa, lakin son dərəcə siyasi məna daşıyan bu mesaj qısa müddətdə geniş rezonans yaradıb.

Nur Pəhləvinin paylaşımı xüsusilə İran hakimiyyətinə yaxın media orqanlarında kəskin tənqid olunub. SEPAH-a bağlı informasiya resursları onun addımını sərt ifadələrlə hədəfə alaraq xəbəri “Devrilmiş İran şahının nəvəsinin həyasızlığı!” başlığı ilə yayımlayıblar.

Rəsmi dairələrə yaxın şərhçilər bu addımı “İran xalqına qarşı açıq hörmətsizlik” kimi qiymətləndirərək şah ailəsinin hələ də ölkəyə qarşı düşmən mövqedə olduğunu iddia ediblər. (Musavat.com)