Türkiyənin ən böyük kardiologiya mərkəzində GÜCLÜ YANĞIN - VİDEO

İstanbulun Kartal rayonunda yerləşən Koşuyolu Yüksək İxtisas və Araşdırma Xəstəxanasının damında yanğın baş verib.

Publika.az xəbər verir ki, bu barədə "CNN Türk" telekanalı məlumat yayıb.

Sözügedən xəstəxana Türkiyənin iri kardiologiya mərkəzlərindən biridir. İstanbulun Asiya hissəsində yerləşən xəstəxana ölkənin hər yerindən gələn pasiyentləri qəbul edir.

"Milliyet" qəzetinin məlumatına görə, yanğın xəstəxananın əlavə korpusunda başlayıb. Hadisə yerinə yanğınsöndürmə briqadaları göndərilib və onlar alovu söndürməkdə davam edirlər.

"CNN Türk"ün redaktoru Arif Bayqut canlı yayımda bildirib ki, yanğın xəstəxananın əlavə korpusunun damında başlayıb, qatı tüstü artıq ətraf ərazini bürüyüb. Onun sözlərinə görə, yanğınsöndürənlərin əsas səyləri alovun aşağı mərtəbələrə və xəstəxananın əsas korpuslarına keçməsinin qarşısını almağa yönəlib.

“Hazırda bildiyimiz odur ki, yanğın xəstəxananın əlavə korpusunun damında başlayıb. Səbəb hələ müəyyən edilməyib. Qatı tüstü artıq ətrafı bürüyüb. Hadisə yerinə yanğınsöndürmə briqadaları göndərilib. Onların işi davam edir. Alovun aşağı mərtəbələrə və xəstəxananın əsas bloklarına çatmaması üçün böyük səylər göstərilir”, - Bayqut bildirib.

Xəstəxanadakı pasiyentlər təxliyə edilir. Zərərçəkənlər barədə hələlik məlumat yoxdur. Yanğının səbəbi müəyyən edilməyib.

Hüseyn İbadlı