Paşinyan tarix açıqladı: Ermənistan Aİ-yə üzvlük üçün müraciət edəcək

Ermənistan 2027-2028-ci illərdə Avropa İttifaqına (Aİ) tamhüquqlu üzvlük prosesinə başlamaq üçün rəsmi müraciət edə bilər.

Publika.az xəbər verir ki, bunu Ermənistanın baş naziri Nikol Paşinyan bildirib.

O, Brüsseldə səsləndirdiyi fikri bir daha təkrarlayaraq qeyd edib ki, bu, hələ üzvlük prosesinə hazırlığın başlanması demək deyil. Paşinyanın sözlərinə görə, Ermənistan xalqına verdiyi vədə uyğun olaraq alternativ istiqamətin formalaşdırılması üzərində işləyir.

Baş nazir Ermənistanın Avrasiya İqtisadi İttifaqından (Aİİ) çıxmaq niyyətində olmadığını vurğulayıb. Bununla belə, Aİİ tərəfdaşlarının İrəvan qarşısında bu məsələyə aydınlıq gətirmək və referendum keçirmək tələbini qaldırdıqlarını bildirib.

Paşinyan qeyd edib ki, Aİ-yə üzvlüklə bağlı referendumun keçirilməsi üçün əvvəlcə müəyyən prosedurlar tamamlanmalıdır:

“Prosesin bizi bu istiqamətə apardığı mənim üçün aydındır. Nəticədə 2027-ci və ya 2028-ci ildə Aİ-yə tamhüquqlu üzvlük prosesinə başlamaq məsələsi ilə bağlı rəsmi müraciət edəcəyik. Üstəlik, bununla bağlı qüvvədə olan qanun da var”.

Müəllif: Adəm