Havanın çirklənməsi 100 min insanın ölümünə səbəb oldu

Beynəlxalq alimlər qrupu tropik şəhərlərdə havanın çirklənməsinin 100 mindən çox insanın ölümünə səbəb olduğunu müəyyən edib.

Publika.az xəbər verir ki, bu barədə “Science Advances” jurnalında dərc olunan məqalədə deyilir.

Tədqiqatçılar 2005-ci ildən 2018-ci ilə qədər NASA və Avropa Kosmik Agentliyinin peyklərindəki alətlərdən istifadə etməklə Afrika, Asiya və Yaxın Şərqdə 46 metropoliya ərazisi üçün hava keyfiyyəti məlumatlarını təhlil ediblər. Mütəxəssislər bütün şəhərlərdə sağlamlığa birbaşa təhlükə yaradan çirkləndiricilərin tərkibində illik əhəmiyyətli artım aşkar ediblər. Məsələn, azot dioksid 14 faiz, incə hissəciklər 8 faiz, ammonyak 12 faiz, uçucu üzvi birləşmələr 11 faiz artıb.

Bu, yeni sənaye mənbələri, eləcə də nəqliyyat, zibil yandırma, kömür və yanacaq odununun geniş yayılması səbəbindən havanın keyfiyyətinin sürətlə pisləşməsi ilə əlaqədardır. Alimlər həmçinin azot dioksid emissiyalarına görə 46 şəhərdən 40-da və PM2.5 hissəcikləri emissiyalarına görə 46 şəhərdən 33-də şəhər havasının çirklənməsinə məruz qalmanın 1,5-4 dəfə artdığını müəyyənləşdirib.

Havanın çirklənməsi nəticəsində erkən ölüm halları ən çox Cənubi Asiya şəhərlərində, xüsusilə Dəkkə, Banqladeşdə (24 000) və Hindistanın Mumbay, Banqalor, Kəlküttə, Heydərabad, Çennai, Surat, Pune və Əhmədabad şəhərlərində (100 000 nəfər) olub.