Koronavirus yoxa çıxdı, daha peyvəndə ehtiyac yoxdur - Professor deyir ki...

Koronavirusla bağlı açıqlanan gündəlik statistik məlumatda bir məqam diqqəti cəlb edir: peyvənd olunanların sayı kəskin azalıb. Hətta elə günlər olur ki, bir nəfər də peyvənd olunmur. Axı ölkədə hamı peyvənd olunmayıb? Üstəlik, hər gün yüzlərlə insanın 18 yaşı tamam olur. Deməli, onlar da peyvənd olunmalıdırlar. Amma statistik məlumatlar biganəlikdən, məsuliyyətsizlikdən xəbər verir.

Bu biganəlik və məsuliyyətsizlik hansı fəsadlar yarada bilər? Ümumiyyətlə, hesab etmək olarmı ki, artıq pandemiya bitib, koronovirus məğlub edilib?

Mövzu ilə bağlı Publika.az-a açıqlama verən professor Adil Qeybulla hesab edir ki, Azərbaycanda epidemioloji vəziyyət digər ölkələrlə nisbətən daha ürəkaçandır. Onun sözlərinə görə, yoluxma halları azalıb, eyni zamanda ağırlaşmaların da sayında azalma müşahidə olunur:

"Kollektiv immunitet formalaşıb və buna görə də peyvəndə tələb azalıb. Pandemiya şəraitində peyvənd sertifikatı tələb edirdilər. İnsanlar da bu kartı almaq üçün peyvənd olunurdular. Azərbaycanda artıq pandemiya sona doğru yaxınlaşır. Amma Ümumdünya Səhiyyə Təşkilatı tərəfindən hələ ki, raport verilməyib. Karantin də, yumşaldılmış şəkildə qalmaqda davam edir. Yəqin ki, yaxın günlərdə pandemiyanın bitməsi haqqında qərardan sonra bu və ya digər məsələlər öz qaydasına düşər".

Həkim onu da bildirib ki, yoluxanların sayının azaldığını düşünərək, ehtiyatı da əldən vermək olmaz: "Təhlükə hələ də sovuşmayıb. Digər ölkələrdə pandemiya davam etməkdədir. Nəzərə alaq ki, hava yolları açıqdır və bu da onu göstərir ki, daim diqqətli olmaqda fayda var”.

İnfeksionist Aytəkin Əliyeva da deyir ki, koronavirus hələ də var və buna görə də diqqətli olmaq vacibdir:

"Operativ Qərargahın qəbul etdiyi qaydalara əməl etməliyik. COVID-19-la mübarizədə birinci addım, ilk növbədə peyvənddir. 18 yaşı tamam olan hər bir vətəndaş peyvənd olunmalı, müəyyən edilmiş qaydalara riayət etməlidir. Belə olan halda virusla mübarizədən alnıaçıq çıxa bilərik”.

Mehin Mehmanqızı