“Hər xəstənin ağrısı ilə yaşamaq...” - Həkimdən təsirli paylaşım

"Bir həkimin yetişməsi üçün uzun zaman, gərgin əmək və yuxusuz gecələr tələb olunur. Hər bir xəstənin həyatı, ağrısı və acısı ilə yaşamaq da həkimin payına düşən bir qismətdir".

Publika.az xəbər verir ki, bu fikirləri Pediatrik Kardiologiya və Revmatologiya İctimai Birliyinin sədri Sveta Rafiyeva sosial media hesabında bildirib.

Onun sözlərinə görə, hər hansı ağır diaqnozu xəstəyə demək, onun ümidsiz baxışlarını görməmək üçün gözlərini kənara çevirmək də həkimin taleyinə düşən çətin məqamlardandır:

"Elm qarşısında hələ də aciz qalan bəzi xəstəliklərin müalicəsinin mümkünsüzlüyü qarşısında sanki günahkar sən özünsənmiş kimi hiss etmək də həkimin qismətidir.

44 günlük müharibə zamanı fədakarlıq göstərən həkimlərə xüsusi ehtiram düşür. COVID-19 pandemiyası zamanı həyatını təhlükəyə atan həkimlərdən isə danışmıram.

Bu qərarda məni ən çox sevindirən məqamlardan biri də məhz regionlarda kadr çatışmazlığının aradan qaldırılması və bölgələrdə, xüsusilə də gənc kadrların işləməsinin stimullaşdırılması üçün bonus əmsalının tətbiqidir.

Ümid edirəm ki, bu qərar tezliklə digər sahələrdə çalışan, TƏBİB-in tabeliyində olmayan digər səhiyyə işçilərinə də şamil ediləcək".