Bayıldakı evlərin 98 faizi sənədsizdir - İcra başçısı

Bayıldakı sürüşmə sahəsindəki sakinlərin hansı müddətdə kirayədə yaşayacaqlarının da mütəxəssis rəyindən sonra bilinəcək.

Publika.az xəbər verir ki, bu sözləri 163 №-li orta məktəbdə Səbail Rayon İcra Hakimiyyəti başçısı Eldar Əzizov Bayılda yaranmış sürüşmə təhlükəsi ilə əlaqədar Cənub Dərə yaşayış sahəsindəm müvəqqəti köçürülən vətəndaşlarla keçirilən görüşdə bildirib.

Onun sözlərinə görə, bu gündən kirayə haqları verilməyə başlanılıb. İlkin mərhələdə 67 nəfər kirayə pulu alacaq:

“Birdəfəlik kompensasiya məsələsinə isə baxılır. Sakinlərin nə qədər kirayədə qalması prosesdən asılıdır. Alimlər işləyir, onlar araşdırma aparandan sonra hansı evin təhlükəli zonada yerləşdiyi məlum olsa, ona kompensasiya veriləcək. Hansı ev zonadan kənarda olsa, sakinlərə həmin evə qayıdıb yaşamağa icazə verilsə, onlar geri qayıdacaq”.

E.Əzizov son günlərdə yamacda baş verən prosseslər, yerli və xarici mütəxəssislər tərəfindən aparılan araşdırmaların vəziyyəti, mövcud şəraitdən çıxış yolları, burada görülən və görülməsi nəzərdə tutulan tədbirlər, narahatedici amillər barədə ətraflı məlumat verib:

“Sürüşmə təhlükəsi ilə bağlı ərazidən 93 fərdi evdə yaşayan sakinlər köçürülüb. Onlarin bir qismi öz qohumlarının evlərinə, digərləri isə 163 №-li orta məktəbdə yadılmış müvəqqəti sığınağaqda yerləşdiriliblər. Fevralın 10-da həmin ərazidə 4 yaşayış evi tam, 2-si isə qismən dağılmışdır. Yalnız görülmüş tədbirlərin nəticəsidir ki, burada xəsarət alan olmayıb. Rayon İcra Hakimiyyəti tərəfindən ayrılmış nəqliqqat və işçi qüvvəsinin köməyi ilə vətəndaşların əmlakı çıxarılaraq başqa yerlərə daşınıb. Ərazidən köçürülən sakinlərin əmlakının qorunması üçün burada postlar gücləndirilib. İcra Hakimiyyəti tərəfindən 163 №-li məktəbdə yaradılan sığınacaqda vətəndaşlar üçün hər cür şərait yaradılıb".

Eldar Əzizov qeyd edib ki, cənab Prezidentin siyasətinin mərkəzində Azərbaycan vətəndaşı durur: "Sürüşmə ərazisindəki evlərin 98 faizinin heç bir sənədi və qeydiyyatı olmayan qanunsuz tikililərdir. Lakin buna baxmayaraq dövlət hər kəsə bərabər münasibət göstərir. Onların problemlərinin həlli üçün müvafiq tədbirlər görüləcəkdir".