Sosial

Kəlbəcərdə minaya düşərək həlak olan jurnalistlərin anım mərasimi keçirilir - FOTO

4 İyun 2021 16:50

Bu dəqiqələrdə Azərbaycan Televiziya və Radio Yayımları Qapalı cəmiyyətinin qarşısında iyunun 4- də Kəlbəcərdə şəhid olan jurnalistlərin anım mərasimi keçirilir.

Publika.az-ın əməkdaşlarının verdiyi xəbərə görə, anım stendini media kapitanları, jurnalistlər ziyarət edirlər. Azərbaycan mediasının nümayəndələri baş verən hadisədən təəssüfləndiyini bildiriblər. Şəhid jurnalistlərimizə Allahdan rəhmət diləyiblər.

Səbail Rayonunun İcra Hakimiyyətinin başçısı Vüqar Zeynalov şəhid jurnalistlərin anım stendinə gül dəstələri düzüb. Baş verən faciədən təəssüfləndiyini, şəhid jurnalistlərin ailələrinə dərin hüznlə başsağlığı verdiyini dilə gətirib.

MEDIA-nın rəhbəri Əhməd Mustafayev də anım stendinə gül dəstələri düzüb və şəhid jurnalistlərimizə Allahdan rəhmət diləyib.

Real Televiziyasının rəhbəri Mirşahin Ağayev isə bildirib ki, biz qələbə qazansaq da, erməni vəhşiliyi ilə mübarizə davam edir: "Sadəcə müstəvi dəyişib. Baş verən bu hadisə iyrənc bir təxribatdır. Müharibə başa çatıb, biz qələbə qazanmışıq. Baş verən bu hadisə Xocalı faciəsinin davamıdır. Jurnalistlərimizə rəhmət diləyirəm. Cənnətləri vətənimiz olsun".

Qeyd edək ki, bu gün səhər saatlarında AZƏRTAC-ın əməkdaşı Məhərrəm İbrahimov və AZTV-ni təmsil edən Sirac Abuşov Kəlbəcərin Susuzluq kəndi istiqamətində ermənilərin basdırdığı minaya düşərək şəhid olublar.

Publika.az anım mərasimindən fotoları təqdim edir:

Tural Turan

Foto: Pərviz Həşimi