Rusiyada yaşamaq sevdasına düşənlərə ÜZÜCÜ XƏBƏR - Putin daha bir qadağa qoydu

Rusiya Prezidenti Vladimir Putin məhkumluğu olan əcnəbilərin ölkə vətəndaşlığı və ya yaşayış hüququ əldə etməsini qadağan edən qanunu imzalayıb.

Publika.az xəbər verir ki, sənəd hüquqi aktların rəsmi portalında yayımlanıb.

Qanun Rusiya ərazisində və ya onun hüdudlarından kənarda törədilmiş cinayətə görə məhkumluğu götürülməmiş və ya ödənilməmiş əcnəbilərə və vətəndaşlığı olmayan şəxslərə şamil edilir. Bu hal müvəqqəti yaşamaq icazəsinin və daimi yaşamaq icazəsinin verilməsindən imtina üçün əsas olacaq. Bundan əlavə, 14 yaşına çatmış miqrantlar ərizə təqdim edilməzdən ən çox üç ay əvvəl mənşə ölkəsində verilmiş məhkumluğun olmaması barədə arayışı təqdim etməlidirlər.

14 yaşınadək yetkinlik yaşına çatmayanlar, qaçqınlar, müqavilə əsasında hərbi xidmət keçənlər və döyüş əməliyyatlarının iştirakçıları üçün istisnalar nəzərdə tutulub.

İyulun sonunda Putin əmək miqrantlarının ölkədə qalması və işləməsi qaydalarını sərtləşdirən bir sıra qanunları da imzalayıb.

Hüseyn İbadlı