Xəbərdarlıq edildi: 49 milyon insanı bu təhlükə gözləyir

BMT-nin Dünya Ərzaq Proqramı (WFP) 2027-ci ilin sonunadək daha 49 milyon insanın kəskin ərzaq çatışmazlığı ilə üzləşə biləcəyi barədə xəbərdarlıq edib.

Publika.az xəbər verir ki, təşkilatın hesabatına əsasən, 2026-2027-ci illərdə güclənəcək "El-Ninyo" iqlim hadisəsi dünyanın bir sıra bölgələrində ərzaq təhlükəsizliyini ciddi şəkildə pisləşdirə bilər.

Ekspertlər xatırladıblar ki, 2015-2016-cı illərdə müşahidə olunan əvvəlki güclü "El-Ninyo" dövründə 60-100 milyon insan ərzaq qıtlığından əziyyət çəkmişdi.

Qeyd edək ki, "El-Ninyo" ekvatorial Sakit okeanda səth sularının qeyri-adi istiləşməsi ilə xarakterizə olunan dövri iqlim hadisəsidir. Bu proses dünyanın müxtəlif bölgələrində quraqlıq, daşqınlar, məhsuldarlığın azalması və ekstremal istilərə səbəb olur. Nəticədə kənd təsərrüfatı məhsullarının istehsalı zəifləyir və xüsusilə kənd təsərrüfatından, eləcə də humanitar yardımdan asılı ölkələrdə ərzaq böhranı dərinləşir.

BMT-nin Dünya Ərzaq Proqramı vurğulayıb ki, "El-Ninyo" qlobal ərzaq böhranını daha da ağırlaşdıra biləcək əsas amillərdən biri olaraq qalır.

Müəllif: Adəm