Gürcüstanda iqtidar müxalifətin diqtələrini qəbul etdi: "Parlamentə gəlin"

"Hesab edirəm ki, artıq parlamentə qayıtmaq vaxtı gəlib çatıb. Biz onlara deyirik ki, parlamentə gəlin. Düşünürük ki, ictimaiyyətin problemlərini həll etmək üçün, biz birlikdə qərarlar verməliyik".

Publika.az Gürcüstan KİV-lərinə istinadla xəbər verir ki, bu sözləri parlamentin sədri, Arçil Talakvadze müxalifətlə dialoqu şərh edərkən deyib.

Onun sözlərinə görə, hakim partiya razılığın əldə edilməsi üçün müəyyən addımlar atacaq:

"Biz müxalifətlə siyasi dialoq prosesinə Gürcüstanın avropalı dostlarının da qatılmasını alqışlayırıq. Bu addım razılığın ədalət prinsipləri çərçivəsində əldə edilməsinin şanslarını artırır. Bununla biz ictimaiyyətimizin sifarişi ilə birlikdə daha da konstruktiv əməkdaşlıq mərhələsinə keçəcəyik. Razılığın əldə edilməsi üçün ədalətli prinsiplər çərçivəsində addımlar atacağıq. Mövcud siyasi problemi bağlamaq üçün biz tərəfdə yetərincə motivasiya var. Mövcud problemi həll etdikdən sonra isə birlikdə cəmiyyətimizi narahat edən problemlərin həllinə başlamalıyıq", - deyə Arçil Talakvadze bildirib.

Xatırladaq ki, Avropa İttifaqı (Aİ) Şurasının prezidenti Şarl Mişelin şəxsi nümayəndəsi Kristian Danielsonun iştirakı ilə, sabah hakimiyyət nümayəndələri və müxalifət arasında danışıqların beşinci mərhələsi keçiriləcək.

Tural Turan