Gürcüstanda 31 yaşlı azərbaycanlı qətlə yetirildi

Gürcüstanın Acarıstan bölgəsinin Kobuleti qəsəbəsində bu gün qətlə yetirilən gəncin kimliyi məlum olub.

Həmin şəxs Bolnisi rayonunun 31 yaşlı sakini Yaşa İsmayılovdur.

İstintaqla müəyyən edilib ki, 22 yaşlı şəxs mübahisə zəminində tanışı Y.İsmayılova soyuq silahla xəsarətlər yetirib və hadisə yerindən qaçıb. Həmin şəxs “isti izlər”lə saxlanılıb, bıçaq maddi sübut kimi müsadirə edilib.

Soydaşımız xəstəxanaya çatdırılsa da, həkimlər onun həyatını xilas edə bilməyiblər. Onun mövsümi işlər üçün Acarıstana getdiyi bildirilir.

Gürcüstanın Daxili İşlər Nazirliyində (DİN) faktla bağlı qəsdən adam öldürmə maddəsi üzrə istintaq davam etdirilir. Törədilmiş cinayətə görə 7 ildən 15 ilədək azadlıqdan məhrum etmə cəzası tətbiq olunur.

Qeyd edək ki, Gürcüstanın bəzi yerli KİV-i öldürülən gəncin Azərbaycan vətəndaşı olması barədə məlumatlar yaysa da, DİN bu informasiyanı təkzib edib.(Report)

xxxxx

Gürcüstanın Acarıstan Muxtar Respublikasının Kobuleti qəsəbəsində qətl törədilib.

“Report”un yerli bürosu xəbər verir ki, hadisə Kostava küçəsində qeydə alınıb.

İnsidentdən öncə mübahisənin baş verdiyi bildirilir. Yaralanan şəxs xəstəxanaya çatdırılsa da, onun həyatını xilas etmək mümkün olmayıb.

“Rustavi 2” telekanalının məlumatına əsasən, qətlə yetirilən şəxs Azərbaycan vətəndaşıdır.

Gürcüstanın Daxili İşlər Nazirliyindən (DİN) bildirilib ki, faktla bağlı Cinayət Məcəlləsinin qəsdən adam öldürmə maddəsi üzrə istintaq aparılır və qətli törədən şəxsin kimliyi artıq müəyyən edilib.

DİN “Report”ın yerli bürosuna qətlə yetirilən şəxsin Azərbaycan vətəndaşı olması barədə yayılan məlumatı təkzib edib.