Bu batalyon Kadırovun 18 yaşlı oğlunun nəzarətinə verildi

Rusiya Milli Qvardiyasının Ukrayna müharibəsində döyüşmək üçün yaradılan Baysanqur Benoyevski adına batalyonu Çeçenistan prezidenti Ramzan Kadırovun 18 yaşlı oğlu Adam Kadırovun nəzarətinə verilib.

Publika.az xəbər verir ki, bu barədə “Novaya Gazeta Europe” nəşri yazıb.

Nəşrin məlumatına görə, Baysanqur Benoyevski adına batalyon Şeyx Mənsur batalyonundan fərqli olaraq, döyüşlərdə nadir hallarda iştirak edir və yüksək səviyyəli təchiz edilmiş elit bölmə olsa da, Qroznıdan kənara çıxmır. Şeyx Mənsur batalyonu Müdafiə Nazirliyinin könüllü bölməsi kimi yaradılıb, sağlamlığından asılı olmayaraq, xidmət etmək istəyən hər kəsi qəbul edir. Eyni zamanda, cinayətkarlar da batalyonda xidmət edə bilirlər. Benoyevski batalyonuna qoşulmaq istəyənlər üçün isə ciddi tələblər var.

Ramzan Kadırova yaxın olan Zamid Çalayevin qardaşı Bekxan Çalayev batalyona komandir təyin edilib. Ümumi nəzarəti isə Adam Kadırov edir. O, mütəmadi olaraq batalyona baş çəkir. Batalyonun bütün nəqliyyat vasitələri əvvəllər Ramzan Kadırova məxsus olan “Dustum 95” nömrəsi ilə lisenziyalaşdırılıb.

Batalyon yaradılandan bəri cəmi iki dəfə cəbhə bölgəsində olub. 2024-cü ilin yazında Çalayevin rəhbərliyi ilə 20 döyüşçüdən ibarət qrup Zaporojye bölgəsinə səfər edib, lakin döyüşlərdə iştirak etdikləri təsdiqlənməyib və 2025-ci ilin avqustunda komandirləri olmadan yenidən döyüş bölgəsinə baş çəkiblər.

Asif