İspaniyada vətəndaş müharibəsi başlayır? - Hərbi müdaxilə variantı MASADA

Kataloniya parlamentinin sentyabrın 6-da qəbul etdiyi qərar ölkəni vətəndaş müharibəsi həddinə gətirib.

Publika.az “Röyters” agentliyinə istinadən xəbər verir ki, İspaniya hökumətindən yüksək vəzifəli bir səlahiyyətli referendumun keçirilməməsi üçün bütün vasitələrdən istifadə olunacağını deyib.

O vurğulayıb ki, muxtar qurumların səlahiyyətlərini donduran və mərkəzi hökumətə keçməsini təmin edən Konstitusiyanın 155-ci maddəsinin Katalonya üçün də tətbiq olunması mümkün variantlardan biridir. Hökumət rəsmisi hərbi müdaxiləni də son variant kimi istisna etmədiyini söyləyib.

Qeyd edək ki, sentyabrın 6-da Kataloniya parlamenti müstəqillik haqda referendumun keçirilməsi barədə rəsmi qərar qəbul edib. Oktyabrın 1-də keçirilməsi planlaşdırılan referendum baş tutarsa və insanların əksəriyyəti müstəqilliyin lehinə səs verərsə yerli qanunvericiliyə əsasən Kataloniya 48 saat ərzində müstəqilliyini elan edəcək.

İspaniya hökuməti isə bu qərarı pisləyib və onu qanunsuz adlandırıb. İspaniyanın Baş naziri Mariano Raxoy keçirdiyi mətbuat konfransında bildirib ki, bu referendum baş tutmayacaq.

“Heç kim İspaniyanın ərazi bütövlüyünü poza bilməz”, - o deyib.

Ömər Dağlı