Magazin2

Tanınmış aktyor qorxu içində: “Türmədə yatıb-çıxan bir kişi…”

28 Noyabr 2015 12:02

Musiqili Teatrın qocaman aktyoru Novruz Qartal həyəcan içindədir.

Publika.az-a açıqlama verən aktyor uzun illərdən sonra ilk dəfə olaraq dramatik rolda oynayacağını deyib:

“Gənclər saqqızımı oğurlayıb öz tərəflərinə çəkdilər. Teatrımızda bir qrup cavan aktyor və rejissor Anar Sadıqov məni inandırmağa çalışdılar ki, dramatik rolda çıxış edə bilərəm. Hətta mənə dedilər ki, sən qoca deyilsən, hətta bizimlə çalışsan, daha da cavanlaşarsan. Çox həyəcan keçirirəm, hətta qorxuram. Bilmirəm, məndə alınacaq, ya yox. Çünki ömrü boyu komediyalarda çıxış etmişəm, məni dramatik rolda görən olmayıb”.

Aktyorun oynadığı rola gəlincə, o, həbsxana həyatı keçirən avtoritet obrazını canlandıracaq:

“Xarakterimin əksi olan bir obrazdır. Türmədə yatıb-çıxıb, sözünün qabağına söz deyilməyən, özündənrazı bir kişi obrazıdır. Tamaşa hazır olanda gəlib baxarsınız”.

Cəvahir