Bakıya qarşı sanksiya cəhdlərinin sirri çözüldü: Qarabağda “təslimçi sülh?” – ETİRAF

“Bizə söz verdilər ki, Bakıya qarşı ən sərt sanksiyalar tətbiq ediləcək. Haradadır o sanksiyalar?!”

Publika.az xəbər verir ki, bu sözlər “armenianreport” saytının “Zərbə arxasınca zərbə: indi də ABŞ-dan” başlıqlı məqaləsində deyilir.

Məqalədə yer alan bu fikirlər və Serj Sarkisyan hakimiyyətinə ünvanlanan ittihamlar indiyə qədər okeanın o tayından Azərbaycana qarşı sanksiya tətbiq edilməsi cəhdlərinin arxasındakı sirri də çözür.

“Bu, artıq açıq məğlubiyyət və uğursuzluğun son həddidir. Və hər kəs bizim hökmdarlarımızı deyil, dövlətimizi tənqid edir. Xalq baş verənlərin hesabını hökmdarlardan tələb etmir”, - deyə qeyd olunan məqalədə “dördgünlük müharibə”dən sonra Rusiyaya qarşı keçirilən aksiyalara toxunulur, Dmitri Roqozinin erməniləri ittiham etməsi tənqid olunur.

Ardınca məqalədə yer alan fikirlər sonuncu dəfə ABŞ Helsinki Komissiyasının üzvü, konqresmen Kristofer Smitin “Azərbaycanda Demokratiya Aktı” qanun layihəsi ilə gündəmə gələn ölkəmizə qarşı sanksiya çağırışının arxasındakı qaranlıq əllərə işıq tutur.

“Azərbaycan Rusiyadan, İsraildən və bir çox ölkədən rahat şəkildə silah alaraq ordusunu gücləndirdi. Amma bizim hakimiyyətimiz buna qarşı heç nə edə bilmədi, ən yaxşı halda susdu. Ermənistanda hakimiyyət artıq çoxdandır ölkənin təhlükəsizliyi məsələsini diasporun çiyinlərinə yükləyib. Guya ki, diaspor Azərbaycana qarşı demokratiya çağırışları ilə dünyanın diqqətini bura cəlb edəcək və rəsmi Bakının qollarını qandallayacaq. Bizə söz verdilər ki, Bakıya qarşı ən sərt sanksiyalar tətbiq olunacaq. Haradadır o sanksiyalar?! Onlar yoxdur. Ən pisi isə ABŞ-da Bakıya təzyiq məsələsini təxirə salmaq qərarını verdilər. Bunu ABŞ-ın Bakıdakı səfiri Robert Sekuta da açıq şəkildə ifadə etdi. O, Azərbaycan prezidenti İlham Əliyevin ABŞ-a uğurlu səfərindən və iki ölkə arasındakı isti münasibətlərdən danışdı. Həmçinin, dövlət katibi Con Kerri “Cənub Qaz Dəhlizi” layihəsində Azərbaycan hökumətinin addımlarını bəyəndiyini ifadə etdi. Bununla yanaşı, Amerika investisiyalarının Azərbaycan iqtisadiyyatının inkişafına cəlb edilməsi məsələsinin gündəmdə olduğunu bildirdi. Bu, diasporun Azərbaycana qarşı sanksiyaların tətbiq olunması istiqamətində fəaliyyətinin sonudur. Deməli, Ermənistan ABŞ-dan da ümidlərini kəsib. İndi biz kimə söykənək?”, - deyə məqalədə qeyd olunur.

Göründüyü kimi, erməni jurnalistlərin özləri də bilməyərəkdən Azərbaycana qarşı sanksiya cəhdlərinin arxasında məhz erməni lobbisinin dayandığını etiraf edirlər. Belə görünür ki, iqtisadi və hərbi güc baxımından Azərbaycana çata bilməyəcəyini anlayan Ermənistan diasporun vasitəsilə rəsmi Bakıya təzyiq etmək və beləcə Qarabağdakı işğalı qanuniləşdirmək niyyətində imiş. Bu etirafdan da bəlli olur ki, Ermənistan diasporuna və rəhbərliyinə okeanın o tayında söz verənlər olub.

***

Burada zaman-zaman gündəmə gələn “Vaşinqton Avropanın enerji təhlükəsizliyində mühüm rol oynayan, terrora qarşı mübarizədə aktiv iştirak edən, Cənubi Qafqazda ən konstruktiv bir ölkəyə - Azərbaycana qarşı nədən bu qədər anlaşılmayan mövqe tutur?” sualının da cavabı aydın olur. Deməli, sanksiya cəhdləri Ağ Evin rəsmi mövqeyi yox, məhz erməni lobbisinə bağlı siyasətçilərin işi imiş. Həmçinin, indiyə qədər Azərbaycana qarşı sanksiya çağırışları irəli sürən amerikalı siyasətçilər bir daha göz önünə gəlir.

Misal üçün, “Freedom House” təşkilatının keçmiş rəhbəri Devid Kramer və ABŞ-ın Azərbaycandakı keçmiş səfiri Riçard Kozlariçin Azərbaycana qarşı “Maqnisti aktı” tətbiq etməyə çağırışları, həmçinin, “Azərbaycana qarşı sərt siyasətin vaxtı çatıb” tipli məqalələri yaxın keçmişdir. Bu şəxslərin anti-Azərbaycan mövqeyi uzun illərin sınaqdan çıxmış təcrübəsi kimi təsdiqlənib. Lakin onların Azərbaycana qarşı sanksiya tətbiqinə çağırışlarının arxasında erməni lobbisinin dayandığına dair də informasiyalar var idi. Göründüyü kimi, erməni jurnalistlərin etirafı ilə buna artıq şübhə yeri qalmır.

Maraqlıdır ki, 2015-ci ilin dekabr ayında konqresmen Kristofer Smit tərəfindən gündəmə gətirilən Azərbaycana sanksiya tətbiqi layihəsinə qədər erməni lobbisi bu tipli həmlələrdə Qarabağ məsələsini o qədər də qabartmırdı. Lakin Smitin layihəsində birbaşa rəsmi Bakının Qarabağ məsələsində prinsipiallığını qırmaq hədəflənmişdi.

Sanksiya layihəsində yer alan “Azərbaycanın yüksək çinli şəxsləri ABŞ və Avropaya yalnız Qarabağ danışıqları aparmaq üçün gedə bilərlər” tezisi bunu açıq şəkildə göstərirdi. Plana görə, sanksiya tətbiq olunan Azərbaycan rəsmiləri ABŞ və Avropa ölkələrinə yalnız Qarabağ münaqişəsinə dair danışıqları aparmaq üçün səfər edir və onların qarşısında “təslimçi sülh” sazişi qoyulur. Ya imzalamalı, ya da Azərbaycanın sanksiya yağışına tutulması davam etməli idi. (http://publika.az/p/119315).

Ermənistanın ən böyük ümidi bu idi. Axı qanun layihəsini irəli sürən Smit özgəsi deyildi.

- K. Smit 1992-ci ildə erməni lobbisini təşəbbüsü ilə qəbul olunan və ABŞ-ın Azərbaycana birbaşa dövlət yardımına qadağa qoyan “907-ci düzəliş”in (azadlığa dəstək aktı) əsas müəlliflərindəndir. İndiyə qədər qondarma “DQR”-in müstəqilliyinin tanınması üçün bir çox fəaliyyətləri ilə yadda qalıb. Qondarma “erməni soyqırımı”nın tanınması üçün fəal iş aparır və təkcə 2015-ci ildə bununla bağlı 5 bəyanat verib.

Smitin qondarma “erməni soyqırımı”nın 100 illiyi ərəfəsində Vaşinqtonda keçirilən tədbirdə “Cənab prezident (Obama), sizə müraciət edərək erməni soyqırımının tanınmasını xahiş edirəm. Bu faciənin 100 illiyi ilə əlaqədar biz həqiqəti səsləndirərək Almaniya hökuməti və Papa Fransiskə qoşulmalıyıq. Mən, soyqırımı tanıması və üzr istəməsi ilə bağlı Türkiyə hökumətinə müraciət edirəm. Suriya və İraqda kütləvi zorakılıq hallarının baş verdiyi dövrdə dünyanın qonşuları ilə konstruktiv əlaqələrə malik Türkiyəyə ehtiyacı var. Türkiyə rəhbərliyi öz keçmişini dürüst şəkildə qəbul etdikdən sonra məhz buna nail ola bilər” deyə bəyan etməsi isə bütün kartları açır. Bu və digər faktlar ermənilərin bel bağladığı Smitin – SSRİ-yə qarşı mübarizə aparmış nəhəng Helsinki Komissiyasının üzvünün erməni lobbisinə işlədiyini təsdiq edir.

***

Azərbaycan prezidenti İlham Əliyev Vaşinqtona səfəri ilə bu planları alt-üst etdi. Həmçinin, səfər ərəfəsində erməni lobbisinin ortaya atdığı “Roy-Engels” təxribatının qarşısını aldı. (http://publika.az/p/130608). İndi Ermənistan Qarabağda işğalçı siyasətini davam etdirmək üçün heç bir cinahdan dəstək ala bilmir və ölkə daxilində bir-birinə yağdırdıqları ittihamlarla Azərbaycana qarşı təxribatlarını da ortaya çıxardırlar.

Asif Nərimanlı