Dünyanın ən böyük bankı yüzlərlə əməkdaşı işdən çıxardı

Dünyanın ən böyük banklarından biri olan "JPMorgan Chase & Co" ipoteka departamentində yüzlərlə əməkdaşını işdən çıxarıb.

Publika.az xəbər verir ki, bu barədə “Reuters” mənbələrə istinadən məlumat yayıb.

Bankın sözçüsü izah edib ki, "JPMorgan" mütəmadi olaraq kadr dəyişikliyi edir və lazım gəldikdə vəzifələri ixtisar edir. Lakin bir gün əvvəl maliyyə konqlomeratı 500-dən çox bankiri işə götürmək planlarını açıqlamışdı - "JPMorgan" bu seqmentdə kadrların sayını 20 faizdən çox artırmaqla 2024-cü ilə qədər planı həyata keçirməyi planlaşdırır.

"JPMorgan"ın rəhbəri Ceymi Dimon qeyd edib ki, bankın strategiyası işçilərin artırılmasına söykənir, digər böyük ABŞ bankları isə əksinə, onları ixtisar edirlər. O vurğulayıb ki, qurum digər ölkələrdə də filiallar açmağa davam edir, bununla əlaqədar olaraq şirkət bank sektorunda daha çox işçi işə götürməlidir.

Kütləvi ixtisarlar artıq Amerikanın "Goldman Sachs" bankının üç min əməkdaşına təsir edib. İsveçrənin "Credit Suisse" bankı da işçilərini ixtisar etmək qərarına gəlib - təşkilat 2025-ci ilə qədər işçilərin 17 faizini ixtisar etməyi planlaşdırır.

Aytən Məftun