Trampdan husilərlə bağlı fərman

ABŞ Prezidenti Donald Tramp Yəmən husilərinin “Ənsar Allah” qruplaşmasının ABŞ tərəfindən xarici terror təşkilatı kimi tanınması haqqında fərman imzalayıb.

Publika.az xəbər verir ki, bu barədə Ağ Evin mətbuat xidməti məlumat yayıb.

“Bu əmr "Ənsar Allah" təşkilatının, həmçinin husilər kimi tanınan qrupun xarici terror təşkilatı kimi tanınması üçün nəzərdən keçirilməsi prosesini başladır”, – fərmanda qeyd olunub.

“Husilərin hərəkətləri Yaxın Şərqdəki Amerika mülki şəxslərinin və personalının təhlükəsizliyinə, ən yaxın regional tərəfdaşlarımızın təhlükəsizliyinə və qlobal dəniz ticarətinin sabitliyinə təhdid yaradır”, – sənəddə qeyd olunub.

Fərmana əsasən, ABŞ dövlət katibi 30 gün ərzində Milli Təhlükəsizlik Şurası vasitəsilə prezidentə “Ənsar Allah”ın xarici terror təşkilatları siyahısına daxil edilməsi barədə hesabat təqdim etməli, hesabatın təqdim edilməsindən 15 gün sonra təşkilatın terror təşkilatı kimi tanınması üçün bütün tədbirləri görməlidir.

ABŞ Beynəlxalq İnkişaf Agentliyi (USAID) və Dövlət Departamenti Yəməndə husilərə ödəniş edən və ya qruplaşma ilə mübarizədə beynəlxalq səylərə mane olan istənilən təşkilatla əlaqələri kəsəcək.