ABŞ-da şatdaun sonlandırılır - Yeniləndi

ABŞ Senatı prosedur səsverməsində hökumətin hazırda qismən dayandırılmış fəaliyyətinin (şatdaun) bərpasını nəzərdə tutan qanun layihəsini təsdiqləyib.

Publika.az xəbər verir ki, bu barədə "CNN" məlumat yayıb.

Məlumata görə, sənədi 60 senator dəstəkləyib, 40-ı isə əleyhinə səs verib.

Layihə Nümayəndələr Palatasına qaytarılacaq. Daha sonra onu prezident Donald Tramp imzalamalıdır.

Prosesin bir neçə gün vaxt alacağı bildirilir.

***

ABŞ Konqresinin Senatında respublikaçılar və demokratlar federal hökumətin hazırda qismən dayandırılmış fəaliyyətinin (şatdaun) bərpasını nəzərdə tutan qanun layihəsi üzrə razılığa gəliblər.

Publika.az xəbər verir ki, bu barədə "Politico" və "Fox News" Konqresdəki mənbələrinə istinadən məlumat yayıblar.

Sənədlə bağlı səsvermə bu gün keçiriləcək.

Senatorlar hökumətin maliyyələşdirilməsinin bərpası ilə bağlı daha əvvəl Nümayəndələr Palatası tərəfindən təsdiqlənmiş qanun layihəsini əsas götürməyə razıdırlar.

Razılaşma bağlanma zamanı işdən çıxarılan federal işçilərin kompensasiya ilə yenidən işə bərpa olunmasını da nəzərdə tutur.