Trampın 2000 dollarlıq vədinə SİYASİ ƏNGƏL - Vətəndaşların ümidi puç ola bilər

"ABŞ Prezidenti Donald Trampın az təminatlılara gömrük rüsumlarından dividendlər kimi 2 min dollar ödəmə vədi Konqreslə razılaşdırılmalıdır".

Publika.az xəbər verir ki, bunu Ağ Evin Milli İqtisadi Şurasının rəhbəri Kevin Hassett etiraf edib.

“Bu, qanunvericilik qərarları tələb edəcək”, - deyə Hassett bildirib.

O qeyd edib ki, gömrük rüsumları tətbiq edildikdən sonra büdcədə lazım olan vəsait tapılacaq.

“Bu çekləri ödəmək və büdcəyə müdaxilə etməmək üçün kifayət qədər imkan olacaq”, - deyə Ağ Ev əməkdaşı əlavə edib.

Hassett administrasiyanın bu məsələ ilə bağlı Konqreslə əməkdaşlıq edib-etməyəcəyini dəqiqləşdirməyib, lakin Ağ Evdə bu imkanın fəal şəkildə araşdırıldığını təsdiqləyib.

9 noyabrda Tramp bəyan edib ki, idxaldan rüsumların yığılması ABŞ-ın 37 trilyon dollara çatan dövlət borcunu ödəməyə imkan verəcək. Bundan əlavə, o, bütün az təminatlı vətəndaşlara ödəniş vəd edib. ABŞ liderinin sözlərinə görə, ödənişlər və dövlət borcunun azaldılması xarici ölkələrdən ABŞ-a daxil olan böyük tarif gəlirləri hesabına mümkündür.

Bundan əvvəl Tramp, hökumətin fəaliyyətinin dayandırılması (şatdaun) fonunda bütün vəsaitlərin hərbçilərin maaşlarına yönəldilməsini tapşırmışdı.