Haalandın çəkildiyi reklam gündəm oldu

Norveç millisinin hücumçusu Erlinq Haaland Çin istehsalı bitki çayı üçün çəkildiyi reklam videosu ilə gündəm olub.

Publika.az xəbər verir ki, videonun əvvəlində hər şey adi qaydada başlayır. Arxa fonda futbolçunun adı ilə bağlı məşhur mahnı səslənir, Haaland isə futbol meydançasına çıxaraq özünəməxsus texnikasını nümayiş etdirir. Lakin bundan sonra reklam tamamilə qeyri-adi və fantastik məcraya keçir.

Səhnələrdən birində norveçli futbolçu manqal başında şişlərlə görünür və qəfil ağzından alov çıxır, eyni zamanda əlində Çin bitki çayı bankasını rahatlıqla tutur.

Növbəti kadrlarda Haaland artıq bir bardadır və yanında bir qadınla oturaraq eyni içkini reklam etməyə davam edir. Sanki baş verənlər tamamilə normaldır.

Futbol, alov, manqal və çayın bu qədər qeyri-adi şəkildə birləşdirilməsi videonu qısa müddətdə Çin sosial şəbəkələrində gündəm edib. İstifadəçilər reklamı “kult” adlandırır, bəzi azarkeşlər isə bunun son illərin ən yadda qalan futbolçu reklamlarından biri olduğunu deyirlər.