Cinayətkar 34 il sonra yaxalandı - Sevgilisinin rəfiqəsini...

ABŞ-ın Nyu-Hempşir ştatında Darrell Lavoie adlı peşəkar fotoqraf 34 il əvvəl baş vermiş zorlamaya görə həbs olunub.

Publika.az xəbər verir ki, bu barədə WMUR məlumat yayıb.

İstintaqın versiyasına görə, 1991-ci ilin noyabrında Lavoie o vaxtkı sevgilisinin rəfiqəsinin evinə girərək gizlənib. Qız otağa daxil olan kimi o, üzərinə hücum edib, gözlərini bağlayaraq bıçaqla hədələyib və zorlayıb.

Cinayətkar evdən çıxdıqdan sonra qız baş verən hadisəni təsdiqləmək üçün xəstəxanaya gedib. O, həmçinin polisə müraciət edib, lakin təcavüzkarın üzünü görmədiyi üçün onun görünüşünü təsvir edə bilməyib. Bundan əlavə, qız başına gələnləri rəfiqəsinə də danışıb.

Bundan qısa müddət sonra Lavoie adlı kişinin sevgilisi onun çantasında yapışqan lent, bıçaq, parça və balaklava bənzəri bir şey tapıb. O, sevgilisinin rəfiqəsinə hücum etdiyindən şübhələnib və bunu polisə bildirib. Polis Lavoie-dən DNT nümunələri verməsini istəyib, lakin o, imtina edib. İş dondurulub.

Polis 34 il sonra yenidən həmin kişiyə qarşı hərəkətə keçib. Buna müasir DNT müqayisə texnologiyaları kömək edib, Lavoie tutulub. O, özünü günahkar saymır.

Hüseyn İbadlı