Qrin istefa verdi, Tramp bunu "əla xəbər" adlandırdı

ABŞ Prezidenti Donald Tramp Respublikaçı Partiyasından olan Nümayəndələr Palatasının üzvü Marjori Teylor Qrinin Konqresdən istefa qərarını alqışlayıb.

Publika.az xəbər verir ki, Ağ Ev rəhbəri bu barədə "ABC News"a verdiyi müsahibədə bildirib.

"Düşünürəm ki, bu, ölkə üçün əla xəbərdir. Bu, möhtəşəmdir", - Amerika lideri deyib.

Tramp əlavə edib ki, Qrinin planları barədə əvvəlcədən məlumatı olmayıb. Prezident "onun xoşbəxt olmalı olduğunu" söyləyib.

21 noyabrda Qrin 2026-cı ilin yanvar ayının əvvəlində vəzifəsindən gedəcəyini açıqlayıb. O, bu qərarı Trampla münaqişə fonunda verib.

Xatırladaq ki, noyabrın 15-də Ağ Ev rəhbəri seçkilərdə Qrini dəstəkləmək niyyətində olmadığını açıqlayıb. Trampın sözlərinə görə, sorğu nəticələri göstərir ki, konqresmen Corciya qubernatoru və ya həmin ştatdan senator vəzifəsinə namizəd olsaydı, səslərin yalnız 12%-ni toplayardı. Qrinin istefa verməsini istəyən Tramp onu ölkəyə xəyanətdə ittiham etmiş və qurban imici yaratmağa çalışmaqda günahlandırmışdı.