ABŞ

Trampın əfv edəcəyi hinduşkalar seçildi - FOTO

25 Noyabr 2025 02:19

ABŞ vətəndaşları ABŞ Prezidenti Donald Trampın Şükran Günü üçün əfv edəcəyi iki hinduşkanı seçiblər.

Publika.az xəbər verir ki, Ağ Ev səsvermənin nəticələrini "X" sosial media səhifəsində paylaşıb.

Qobbl və Uoddl adlı hinduşkalar əfv ediləcək.

Məlumata görə, həmin quşlar Şimali Karolinanın Nahunta şəhərində yetişdirilib. Hinduşkalar Vaşinqtona çatanda onlara "Willard InterContinental" otelində "lüks bir qonaqlıq" verilib.

Əfv mərasimindən sonra quşlar Şimali Karolina Dövlət Universitetinin quşçuluq şöbəsinin himayəsində qalacaqlar.

Şükran Günündə ABŞ Prezidentinə hinduşka təqdim etmək ənənəsi 1947-ci ildə Milli Hinduşka Federasiyasının qurucusu Çarlz Vampler sayəsində yaranıb. O, dövlət başçısına - o vaxtkı prezident Harri Trumana (1945–1953) - hinduşka hədiyyə edib.

Rəsmi olaraq hinduşka əfv edən ilk ABŞ Prezidenti Ronald Reyqan (1981–1989) olub. Ancaq bu prosedur yalnız 1989-cu ildə Corc Herbert Volker Buşun (1989–1993) dövründə məcburi hala gəlib.

Ləman