ABŞ immiqrantların deportasiyasını "Şaxta baba"ya həvalə etdi - VİDEO

ABŞ hökuməti süni intellektdən istifadə olunaraq hazırlanmış Milad videosu yayımlayıb. Videoda Şaxta baba ABŞ-ın İmmiqrasiya və Gömrük Xidmətinin (ICE) agenti kimi təsvir olunur.

Publika.az xəbər verir ki, bu barədə “Express” nəşri məlumat yayıb.

Qısa bayram mövzulu videoda qırmızı kostyum və üzərində ICE loqosu olan gülləkeçirməz jilet geyinmiş “Santa Klaus” sənədsiz miqrantları saxlayır və deportasiya üçün təyyarəyə minmələrinə kömək edir. Videodakı mesaj sənədsiz immiqrantlar könüllü olaraq ABŞ-ı tərk etməzlərsə, “Santa Klausun yaramazlar siyahısına düşə biləcəkləri” barədə xəbərdarlıq kimi təqdim olunur.

Agentliyin rəsmi sosial media səhifəsində yerləşdirilən videoda insanlara ölkəni könüllü tərk etmək üçün müraciət məqsədilə “CBP Home” tətbiqindən istifadə etmələri tövsiyə olunur. Bildirilir ki, 31 dekabr 2025-ci il tarixinədək bu proqramdan yararlananlara səyahət xərcləri üçün yardım və “Bayramlar üçün Ev” adlı mövsümi proqram çərçivəsində 3000 dollara qədər maliyyə dəstəyi veriləcək.

Təxminən 18 saniyə davam edən və “Miladınız mübarək” başlığı ilə bitən video, həmçinin Daxili Təhlükəsizlik Departamentinin məcburi deportasiyaya alternativ olaraq sənədsiz immiqrantların könüllü şəkildə ölkəni tərk etməsini təşviq edən daha geniş kampaniyanın bir hissəsidir.

Qeyd edək ki, videonun yayımlanması beynəlxalq mediada və sosial şəbəkələrdə geniş müzakirələrə səbəb olub. Bəzi şərhçilər bunu hökumət mesajını çatdırmağın qəribə üsulu kimi qiymətləndiriblər, digərləri isə immiqrasiya siyasətinin təşviqi üçün “Santa Klaus” kimi bayram obrazından istifadənin etik və mənəvi suallar doğurduğunu bildiriblər.

Adəm