Tramp İrana 15 gün vaxt verdi

ABŞ Prezidenti Donald Tramp Vaşinqtonla saziş bağlamaq üçün İrana maksimum 15 gün vaxt verməyə hazır olduğunu bəyan edib.

Publika.az xəbər verir ki, jurnalistlərlə "Air Force One" göyərtəsində keçirilən brifinqin qeydi "C-Span" portalında dərc olunub.

"Mən deyərdim ki, bu vaxt kifayət etməlidir, maksimum 10-15 gün", - deyə Tramp bildirib.

"CNN" telekanalının məlumatına görə, Tramp İrana qarşı mümkün zərbələrlə bağlı hələ yekun qərar verməyib. Mənbələrdən birinin sözlərinə görə, Tramp özəl söhbətlərində İslam Respublikasına zərbə endirilməsinin həm lehinə, həm də əleyhinə fikirlər səsləndirib, həmçinin müşavirlərinin və Vaşinqtonun müttəfiqlərinin rəyini öyrənib.

"The Wall Street Journal" qəzetinin məlumatına görə, Cenevrədə keçirilən ABŞ-İran danışıqlarında Tehran, Vaşinqtonun nüvə proqramı ilə bağlı əsas narahatlıqlarını aradan qaldırmaq üçün yüksək dərəcədə zənginləşdirilmiş uran ehtiyatlarının bir hissəsini üçüncü tərəfə, məsələn, Rusiyaya göndərməyi təklif edib. Nəşrin yazdığına görə, İran tərəfi zənginləşdirməni üç ilə qədər müddətə dayandırmağa hazırdır. Lakin Tramp administrasiyası proqramın tamamilə dayandırılmasında israr edir.

Hüseyn İbadlı