ABŞ-da benzin bahalaşdı

Hörmüz boğazında gərginliyin artması fonunda ABŞ-da benzin bahalaşıb.

Publika.az "Reuters"ə istinadla xəbər verir ki, ölkədə benzin qiymətinin orta göstəricisi noyabrdan bəri ilk dəfə bir qallon (təxminən 3,8 litr) üçün 3 dolları keçib.

Qiymət artımı qlobal enerji bazarlarında dalğalanma ilə əlaqələndirilir. "Brent Crude Oil"in qiyməti bir barel üçün 80 dollara yaxınlaşıb və bu da yanacaq xərclərini artırıb.

ABŞ-da benzin qiymətlərinin artması aralıq seçkilər ərəfəsində Donald Tramp üçün siyasi çağırış sayılır. "Reuters"in sorğusuna əsasən, respondentlərin təxminən yarısı bildirib ki, neft və qaz qiymətləri artsa, İranla müharibəyə dəstək vermək ehtimalları azalacaq.

"Siebert Financial" şirkətinin baş investisiya direktoru Mark Malek deyib: “Benzin qiyməti ABŞ-da psixoloji baxımdan böyük təsirə malikdir. Çünki bu, istehlakçıların hər gün gördüyü inflyasiyadır”.

ABŞ-ın bəzi ştatlarında qiymətlər milli orta göstəricidən xeyli yüksəkdir və artımın davam edə biləcəyi istisna edilmir.