Trampın təyyarəsində daha bir mediaya qadağa

ABŞ prezidenti Donald Trampın administrasiyası “Politico” qəzetinin jurnalistlərinin prezident təyyarəsi “Air Force One”a (bir nömrəli hökumət təyyarəsi) buraxılmasına icazə verməyib.

Publika.az CNN-ə istinadən xəbər verir ki, “Politico” əməkdaşları bazar ertəsi Trampı səfər zamanı müşayiət edən jurnalistlər qrupuna daxil edilməyib. Bu səbəbdən nəşr Ağ Evin jurnalistlər birliyi qarşısındakı öhdəliklərini yerinə yetirə bilməyəcək.

“Politico”nun nümayəndəsi də qəzet jurnalistlərinin prezident səfərlərini işıqlandırmağa icazə verilən media qrupuna daxil olmadığını təsdiqləyib.

Qeyd edək ki, sentyabrın 26-da “The New York Times” ABŞ-ın dörd böyük televiziya kanalının Trampın iştirakı ilə keçirilən tədbirləri yenidən işıqlandırmağa başlayacağını yazıb.

Bundan əvvəl ABC, CBS, CNN, "Fox News" və NBC telekanalları Ağ Evin media birliyində iştirakdan imtina etmişdi. Buna səbəb Tramp administrasiyasının CNN, MS NOW və “Politico”nun Ağ Evdə fəaliyyətinə çıxışı məhdudlaşdırması olmuşdu.

Müəllif: Adəm