İqlim fəallarından növbəti aksiya: bu dəfə Çarlz Darvinin məzarını boyadılar

İqlim dəyişikliyinə qarşı fəaliyyət göstərən “Just Stop Oil” qrupunun iki üzvü Londondakı Vestminster Abbatlığında məşhur təbiətşünas Çarlz Darvinin məzarını təhrif edib.

Publika.az xəbər verir ki, hadisə səhər saatlarında baş verib.

Alison Li və Di Blay adlı iki qadın fəal Darvinin ağ mərmərdən olan məzar daşının üzərinə narıncı rəngli boya ilə “1,5 is dead!” (“1,5 ölüb!”) sözlərini yazıblar. Bu ifadə, 2024-cü ildə qlobal temperaturun sənaye öncəsi dövrlə müqayisədə ilk dəfə olaraq 1,5°C həddini keçməsinə işarə edir. Fəallar bu hərəkətləri ilə iqlim dəyişikliyinə diqqət çəkib və hökuməti təcili tədbirlər görməyə çağırıblar.

Vestminster Abbatlığının nümayəndəsi məzar daşının təmizlənməsi üçün dərhal tədbir görüldüyünü və narıncı təbaşirin zərər verməyəcəyini bildirib. Abbatlıq ziyarətçilər və ibadət üçün açıq qalır.

Polis hadisə ilə əlaqədar iki qadının həbs olunduğunu və onların hazırda Londonda bir polis bölməsində saxlanıldığını təsdiqləyib.

“Just Stop Oil” qrupu son illərdə idman və teatr tədbirlərini pozmaq, ABŞ səfirliyinin binasını boyamaq və Van Qoqun rəsmlərinə şorba atmaq kimi aksiyalar keçiriblər.