Bu ölkədə yüzlərlə məhbus SƏHVƏN AZAD EDİLDİ

2024-cü ilin mart ayından 2025-ci ilin mart ayınadək Böyük Britaniyada 260-dan çox məhkum səhvən azadlığa buraxılıb.

Publika.az xəbər verir ki, bu barədə "Sky News" telekanalı hökumətin yaydığı statistika istinadla məlumat yayıb.

Qeyd edilib ki, bu göstərici əvvəlki illə müqayisədə 128 faiz artım deməkdir.

Rəsmi məlumatlara əsasən, 233 nəfər məhkum həbsxanalardan, 29 nəfər isə məhkəmə zalından qanunsuz şəkildə azad edilib.

Bu statistika, ictimaiyyətdə geniş rezonans doğuran və ölkə üzrə etirazlara səbəb olan bir qalmaqal fonunda açıqlanıb. Söhbət seksual xarakterli cinayətlərə görə məhkum edilmiş və deportasiya hazırlıqları çərçivəsində səhvən azadlığa buraxılmış qeyri-qanuni miqrant – Efiopiya vətəndaşı Xaduş Kebatu ilə bağlı insidentdən gedir.

2024-cü il sentyabrın 23-də Çelmsford Magistrat Məhkəməsi Kebatunı 14 yaşlı qıza və bir qadına qarşı təcavüzə görə bir il müddətinə azadlıqdan məhrum etmişdi. Lakin o, sonradan Daxili İşlər Nazirliyinin əməkdaşlarına təhvil verilməsi üçün həbsxanadan çıxarılıb və bu proses zamanı yoxa çıxıb. Esseks polisi Kebatunun Londonda gizləndiyini bildirib.

Qeyd edək ki, daha əvvəl bir britaniyalı məhkum da saxta azadlıq sənədləri ilə mühafizəçiləri aldadaraq həbsxanadan qaçmağa nail olmuşdu.

Hüseyn İbadlı