“Əmlak mafiyası” ifşa edildi - Milyonlarla avro ziyan vurulub

Macarıstan Prokurorluğu Budapeşt və Balaton gölü bölgəsində daşınmaz əmlakla bağlı genişmiqyaslı dələduzluqla məşğul olan cinayətkar şəbəkəni ifşa edib.

Publika.az bu barədə M1 telekanalına istinadla xəbər verir.

Vesprem Prokurorluğunun məlumatına görə, hüquqşünasların və bank əməkdaşlarının iştirakı ilə fəaliyyət göstərən qrup cəmi bir neçə ay ərzində təxminən 1,5 milyard forint (təqribən 3,8 milyon avro) həcmində ziyan vurmağa müvəffəq olub.

Cinayətkarların sxemləri illər əvvəl planlaşdırılıbmış. Onlar saxta sənədlər və etibarnamələrdən istifadə etməklə evlərə, mənzillərə və torpaq sahələrinə qanunsuz şəkildə sahib çıxıblar. Bəzi daşınmaz əmlak obyektləri bir neçə il əvvəl vəfat etmiş şəxslərə məxsus idi və onların məlumatlarından sadəcə müqavilələrin saxtalaşdırılması üçün istifadə olunub.

İttiham tərəfinin bildirdiyinə görə, qısa müddət ərzində dələduzlar hər biri 25–236 milyon forint dəyərində olan təxminən 10 obyektə sahib olublar. Ümumilikdə, mənimsənilmiş əmlakın dəyəri təqribən 1,3 milyard forint təşkil edir.

Cinayət sxemində girov əmlakının reallaşdırılması ilə məşğul olan bir şirkətin əməkdaşı əsas rol oynayıb. O, sahibsiz obyektlərin ünvanlarını və onların sahibləri barədə şəxsi məlumatları əks etdirən məlumat bazalarına çıxış imkanı əldə edib. Məhz bu məlumatlar sənədlərin saxtalaşdırılması və mülkiyyət hüququnun qanunsuz olaraq yenidən rəsmiləşdirilməsi üçün əsas olub.

Ümumilikdə, iş üzrə 24 nəfər məsuliyyətə cəlb olunub. Prokurorluq onlar üçün 5 ildən 8 ilədək azadlıqdan məhrumetmə, əmlakın müsadirəsi və müəyyən vəzifələri tutmaq hüququndan məhrumetmə cəzası tələb edir.

Qeyd etmək lazımdır ki, Macarıstanda oxşar hallar əvvəllər də baş verib. Cari ilin aprelində iki macar vəkillə bağlı hökm çıxarılıb. Onlar 2008–2014-cü illər arasında bir əmlak agenti ilə əlbir olaraq, yaşlı və sosial cəhətdən həssas vətəndaşlara məxsus daşınmaz əmlakı qanunsuz şəkildə ələ keçirmişdilər. Həmin vaxt dəymiş ziyan 70 milyon forint təşkil etmişdi. Vəkillərdən biri dörd il həbs cəzası alıb və hüquq praktikasından məhrum edilib, digəri isə şərti cəza alıb.