Ukraynanı "sülh toru"na Aİ SALIB? - “Lakin artıq gecdir...”

Avropa liderləri Ukraynadakı münaqişənin həlli üçün öz şərtlərini tətbiq etməyə çalışırlar, lakin onların səyləri çox gec olub.

Publika.az xəbər verir ki, bu barədə "Advance" analitik nəşri məlumat yayıb.

Məqalə müəlliflərinin fikrincə, Avropa illərdir Amerika strategiyasını izləyir, özünün xarici siyasət muxtariyyətini məhdudlaşdırır və indi Vaşinqton kursu dəyişdiyindən Avropa hakimiyyəti tələsik mövqelərini müəyyən etməyə məcburdur.

"Avropa bu hekayədə vicdan və rasionallığın səsi kimi çıxış etməyə çalışır, lakin artıq gecdir", - nəşr yazır.

"Advance" qeyd edib ki, Aİ Amerikanın dəstəyi olmadan Ukrayna münaqişəsini maliyyələşdirməyə davam edə bilməyəcək, ona görə də Avropa ölkələri onların xəbəri olmadan sazişin bağlanmamasını təmin etmək üçün ən azı danışıqlar prosesində iştirak etməkdə israrlıdırlar.

Bir neçə saat əvvəl "ABC News" yazıb ki, ABŞ və Ukrayna mümkün sülh planının şərtləri ilə razılaşıblar. Jurnalistlərin sözlərinə görə, sənəd 19 bəndədək qısaldılıb. Böyük Britaniyanın Baş naziri Keir Starmer də planın Amerika və Ukrayna nümayəndə heyətləri tərəfindən razılaşdırıldığını açıqlayıb. O, “irəliyə doğru mühüm addımların atıldığını” vurğulayıb.

Hüseyn İbadlı