Hindistanda bənzəri görülməyən koronavirus tədbirləri: hamilə qadın...

Hindistanda yeni tip koronavirus (COVID-19) pandemiyası ilə bənzəri görülməyən formada mübarizə aparılır.

Publika.az xəbər verir ki, xalqın küçəyə çıxma qadağasının qarşısını almaq üçün ölkənin əyalətləri arasındakı sərhədlərə daş divarlar çəkilib, xəndəklər qazılıb və nəzarət məntəqələri artırılıb.

Bu tədbirlər yerli əhalinin narazılığına səbəb olub. Bir əyalətdəki xəstələr digər əyalətdəki xəstəxanaya gedə bilmədiyi üçün yerli idarəetmə orqanlarına etiraz ediblər. Hamilə qadının qonşu əyalətdəki tibb məntəqəsinə getməsi üçün xəndəkdən keçmək məcburiyyətində qalması hər kəsin səbrini daşırıb. Yalnız bundan sonra bəzi əyalətlərdəki tədbirlər aradan qaldırılıb.

Digər tərəfdən, ölkənin qərbində yer alan Qoa əyaləti bütün koronavirus xəstələrinin sağaldığını elan edib. Əyalət virusun yenidən yayılmaması üçün digər əyalətlərlə sərhədlərini bağladığını açıqlayıb.

Bu arada, Hindistanda media qurumları və mətbuat nümayəndələri ölkə miqyasında qabaqlayıcı tədbirlər çərçivəsində tətbiq olunan məhdudiyyətlərə görə maliyyə böhranı ilə üzləşdiklərini, digər tərəfdənsə hökumətin təzyiqlərinə məruz qaldıqlarını bildirir.

Son rəqəmlərə görə, Hindistanda 31 min 332 nəfər koronavirusa yoluxub. 1008 nəfər ölüb.

Zümrüd