Dünya
Zərrabın həbsi... Yaxud İran öz övladlarını niyə “yeyir”?
“İnqilab öz övladlarını yeyir” - Fransada Napoleon
dövründə məşhurlaşan bu sözlər İranın Azərbaycan əsilli iş adamı
Rza Zərrabın ABŞ-da həbsi ilə yenidən yada düşür.
Rza Zərrab kimdir sualına çoxlu cavablar var. Amma gerçək odur ki,
Azərbaycan əsilli biznesmen Qərbin öz kapitalını “uşağa oyuncaq
kimi verdiyi” və haqlarında “uğur hekayələri” uydurduğu
Xodorkoviski, yaxud Abramoviç kimi milyarderlərdən fərqlənir. O,
İranın məşhur valyuta taciri olan Zərrab nəslinin yetirməsidir və
yayılan məlumatlardan belə görünür ki, İran inqilabına xidmət
edib.
“Böyük liderimiz Ayətullah Xamneyinin və Mərkəzi Bankın
hörmətli rəhbərlərinin sanksiyalar qarşısında oynadığı rol,
sanksiyaları təsirsiz hala gətirib, hətta onları özəl metodların
istifadə edilməsi sayəsində əlverişli fürsətə çevirib. Əsas
fəaliyyətin sanksiyaların artırılmasına və sərtləşdirilməsinə
yönəldiyi sirr deyil və İran İslam İnqilabının müdrik liderinin bu
il İqtisadi Cihad ili olacağını elan etməsindən bəri, valyuta
məsələsində yarım əsrlik təcrübəyə malik Zərrab ailəsi maliyyə və
valyuta sanksiyalarına qarşı siyasətin həyata keçirilməsi üçün hər
cür əməkdaşlığa hazır olduğumuzu milli və əxlaqi vəzifəmiz olaraq
bildiririk...”
Amerikalı xəfiyyələrin Rza Zərrabın elektron poçtundan ələ
keçirdikləri bu məktub da belə deməyə əsas verir.
Hazırda ABŞ-da saxlanılan Zərraba qarşı irəli sürülən ittihamların
ümumiləşdirilmiş adını belə ifadə edə bilərik: İrana qarşı
sanksiyaların tətbiq edildiyi zamanlarda ölkə iqtisadiyyatını
ayaqda saxlamaq üçün müxtəlif yollara əl atmaq.
Bəlkə də Zərrab ailəsi bu işdən milyonlar qazanıb. Amma fərqi
yoxdur, söhbət bir vətəndaşın qanunsuz da olsa öz ölkəsinə, yaxud o
ölkəyə rəhbərlik edənlərə xidmətindən gedir. Məktubdan da görünür
ki, Zərrab İranın “dərin dövləti” hesab olunan inqilab
keşikçilərinin - Üləmalar Məclisinin, dolayısı ilə Xamneyinin
göstərişlərini yerinə yetirib.
Səddam Hüseynin dönəmində İraq da ABŞ sanksiyaları qarşısında duruş
gətirmək üçün eyni yollara əl atmışdı. Amerika İraqın əsas gəlir
mənbəyi olan neftini bazara çıxarmağa imkan vermirdi. Çünki rəsmi
Bağdad onun dediklərinə əməl etmir, yaxud kobud desək “dikbaşlıq”
edirdi. Amma İraq neftini müxtəlif yollarla bazara çıxarır və
ölkəyə az da olsa kapital axırdı. Səddam bunun cəzasını boğazına
keçirilən kəndirlə ödədi.
İran da zamanında ABŞ qarşısında duruş gətirməyin cəzasını
indi ödəyir və daha dəhşətlisi odur ki, o, öz balalarını bir-bir
“yeyir”.
Zərrabdan öncə onun ortağı hesab olunan Babək Zəncani ölüm hökmünə
məhkum edildi. Onun da günahı təxminən eyni idi: anti-sanksiya
mexanizmi qurmaq. Zərrab Zəncanidən fərqli olaraq, İranda deyil,
Türkiyədə yaşayırdı. Əgər o da İran sərhədləri daxilində olsaydı,
güman ki, Zəncanidən fərqli tale yaşamayacaqdı.
1. ABŞ Zərrabı “qara siyahı”ya salmamışdı, yaxud onu
İnterpol vasitəsilə axtarışa verməmişdi.
2. Zərrab rahat şəkildə ABŞ-a səfər etmək üçün viza ala
bilmişdi.
Bu iki məqam isə ABŞ-ın Zərrabı həbs etmək üçün əvvəldən xüsusi
plan hazırladığını deməyə əsas verir. Bu, xəfiyyəçilik oyununda ABŞ
üçün böyük uğurdur.
İran “dərin dövlətinə” xidmət etmiş şəxslərin həbsi, yaxud hansısa
formada cəzalandırılması isə Vaşinqtonun Tehran üzərində siyasi
uğuru hesab oluna bilər. Amma 1979-cu ildən sonra dünyanı qarşısına
alan İranın 37 il sonra necə “ələ alındığı” xüsusi maraq
doğurur.
Proseslərin inkişafı İranda indiyə qədər monolit hakimiyyətin
olmadığını aydın şəkildə göstərdi.
Mühafizəkarlar: Ayətullah Xamneyinin rəhbərliyi
altında olan SEPAH (İran İslam İnqilabi Keşişçilər Korpusu) və
“Bəsic” (Xüsusi təyinatlı ordu) kimi güc strukturları.
İslahatçılar: Həsən Ruhani, Haşimi Rəfsəncani,
Mehdi Kərrubi, Ətaullah Muhacirani, Rəhim Məşayi, Məhəmməd Xatəmi
və digərlərinin rəhbərlik etdiyi qrup.
Görünən odur ki, bu iki cəbhə arasında İrana hakim olmaq uğrunda
mübarizə gedib və hər biri ölkəni öz istədiyi istiqamətə yönəltmək
istəyib.
Mühafizəkarlar Qərbə qarşı daim cəbhə açıblar və daha çox Rusiya
ilə əməkdaşlıq ediblər. Lakin bu əməkdaşlıq İranın Rusiyanın
təsirində olması deyil. Sadəcə olaraq, Rusiya İran üçün Qərbə qarşı
mübarizədə müttəfiq olub. Və bu qrup üçün Qərbin liberal dəyərləri
qorxulu kabus kimidir.
İslahatçılar isə birbaşa liberal dəyərlərə üstünlük verir və
ABŞ-Avropa cütlüyü ilə sıx təmasda olublar.
Bu ilin 26 fevral tarixində keçirilən Üləmalar Məclisinə (İranı
faktiki olaraq idarə edən qurum – red.) və parlament seçkilərinə
qədər islahatçılar kölgədə qalırdı. Dolayısı ilə ABŞ İrana təsir
etmək əzmində deyildi. Hətta son üç ildə İrana rəhbərlik edən
islahatçı Ruhani də mühafizəkarların çoxluq təşkil etdiyi Üləmalar
Məclisi qarşısında sərbəst hərəkət edə bilmirdi. Amma Ruhaninin üç
il öncə prezident seçilməsi, liberal mesajlar verməsi, sosial
şəbəkələrdən istifadə etməsi, hətta “Yeni il yolkası” ilə foto
çəkdirib paylaşması islahatçıların – ABŞ-ın İrana yavaş-yavaş
sirayət etdiyini göstərdi.
Ruhaninin prezident seçilməsindən sonra islahatçılarla
mühafizəkarlar arasında İranın idarə olunması uğrunda mübarizə daha
açıq müstəviyə keçdi. Parlament seçkilərinə təxminən üç ay qalmış
isə mübarizə daha qızğın şəkil aldı. İki nümunə bunu aydın şəkildə
göstərir.
1. 2015-ci ilin noyabr ayında Cənubi
Azərbaycandakı soydaşlarımız İranın Radio-Televiziya Təşkilatı
tərəfindən “tualet fırçası” ilə təhqir olundu. Sonradan ortaya
çıxan iddialar əslində bunun parlament seçkilərinə hesablanmış
gediş olduğunu deməyə əsas verirdi. Belə ki, islahatçılar Ayətullah
Xamneyinin səlahiyyətlərinə daxil olan Radio-Televiziya
Təşkilatında azərbaycanlıları təhqir edir, daha sonra buna qarşı
keçirilən etiraz aksiyalarını mühafizəkar qanada məxsus SEPAH və
“Bəsic” yatırır. Bu da seçkilərdə Azərbaycan türklərinin
islahatçılara səs verməsini təmin edir.
2. 2016-cı ilin ilk günlərində Səudiyyə
Ərəbistanının şiə məzhəbinə məxsus Ən-Nimrinin edamından sonra
İranda ərəblərin səfirliyinə hücum edildi. Nəticədə qarşıdurma
məzhəb savaşı səviyyəsinə çıxdı. Burada İranda səfirliyə təşkil
olunan hücum diqqətdən qaçmadı. Aparılan təhlillər ehtimal etməyə
imkan verirdi ki, bu hücum məhz mühafizəkarlar tərəfindən təşkil
olunub. Məqsəd Qərblə nüvə məsələsində razılığa gələn
islahatçıların Ər-Riyadla, yəni ABŞ-ın müttəfiqi ilə
münasibətlərini pozmaq və razılığa mane olmaq idi. Çünki Qərb-İran
yaxınlaşması mühafizəkarları təşvişə salır, onlar ABŞ-ın İran
üzərində güclü təsirə malik olacağından ciddi şəkildə
narahatdırlar.
Mühafizəkarlar bununla həm də seçkilərin nəticələrinə təsir
etməyi düşünürdü. Birincisi, İranın xarici ölkələrlə pis
münasibətlərə sahib olması, hətta müharibə səviyyəsinə çatdırılması
Ruhani iqtidarının ayağına yazılacaq və bu, onun seçkidə səs
itirməsi ilə nəticələnəcək. İkincisi, ona dəstək verən Qərb bu
siyasəti qəbul etməyərək arxasından çəkiləcək.
Nəhayət seçki günü yetişdi və mühafizəkarlar 37 il sonra “zəfər
çələngini” təhvil verməli oldu. Nəticələrə görə, Üləmalar
Məclisinin 88 üzv yerindən 52-ni islahatçı qanad əldə etdi.
Həmçinin, parlamentdə də islahatçılar çoxluğa nail oldu. Bu nəticə
islahatçılara hətta İranın ali dini rəhbərini seçmək imkanı verir.
Yəni artıq “zəfər çələngi” liberalların başındadır, dolayısı ilə
həm də Qərbin.
Bu qalibiyyətdən sonra Amerika onu aldadanları – anti-sanksiya
mexanizmində iştirak edənləri cəzalandıracağı gözlənilən idi. Və
burada tarix diqqət çəkir: fevralın 26-da seçkidə qələbə əldə
olundu, martın 6-da Zəncaniyə edam cəzası verildi, 22 mart
tarixində isə Zərrab ABŞ-da həbs olundu. ABŞ on illərlə nail ola
bilmədiyinə 25 günə əldə etməyə çalışdı və müəyyən qədər buna nail
də oldu. Bu həm də 37 il sonra İranda ikinci inqilabın – liberal
inqilabın baş verməsi idi. Və bu inqilab öz övladlarını yedi.
Asif Nərimanlı
-
Nida Xəbər 17:25
İlham Əliyev Almaniyada mühüm tədbirdə çıxış etdi - Yeniləndi
-
Rəsmi xronika16:53
İlham Əliyevin Almaniya XİN rəhbəri ilə görüşü keçirildi
-
Nida Xəbər 16:06
İrəvandan Tehrana tərs şillə: Yeni qaz kəməri çəkilməyəcək
-
Rəsmi xronika15:18
Azərbaycanla Ermənistan arasında... - İlham Əliyev
-
Sağlamlıq14:56
Bu qan qrupuna aid olan insanlarda insult riski YÜKSƏKDİR
-
Dünya14:01
Sensasion iddia: Asiyada müharibə bu paslı gəmiyə görə başlayacaq - FOTO
-
Nida Təhlil 13:10
Türkiyə hərbçiləri Qarabağa niyə gətirilmişdi? - Əliyevin strateji planı
-
Sosial12:58
Sabah 32 dərəcə isti olacaq