Siyasi qütbləşmə sağlamlığa zərərli imiş

Şimali Karolina Universitetinin psixoloqları müəyyən ediblər ki, siyasi qütbləşmə (siyasi baxışlarda həddindən artıq fərqlilik) sağlamlığa mənfi təsir edir.

Publika.az xəbər verir ki, araşdırmanın nəticələri “The Journal of Health and Social Behavior” jurnalında dərc olunub.

Müəlliflər 4000-dən çox insanın siyasi baxışları, siyasi həyatda iştirakı, müxalif siyasi partiya ilə bağlı yaşanan emosiyalar və sağlamlıq vəziyyəti ilə bağlı sorğunun məlumatlarını təhlil ediblər.

Tədqiqatın nəticələrinin təhlili göstərdi ki, siyasətdə həddən artıq emosional olan və çox qütbləşmiş insanlar öz sağlamlıqlarını daha pis qiymətləndirirlər.

“Qarşı tərəfə qarşı inciklik, qarşı tərəfin üzvləri ilə münasibətdən aktiv şəkildə qaçmaq stresə səbəb olur. Bu, yəqin ki, sağlamlığın pisləşməsinin səbəbidir", - deyə alimlər qeyd ediblər.

Bununla belə, müəlliflər vurğulayırlar ki, iştirakçılar öz vəziyyətlərini özləri qiymətləndirirlər, ona görə də gələcəkdə daha obyektiv nəticələr əldə etmək üçün tədqiqatı təkrarlamağa dəyər.

Ayşən