ABŞ və Tayvan rəsmiləri görüşüblər? - Ağ Ev deyir ki...

ABŞ və Tayvanın yüksək rütbəli rəsmiləri bir sıra təhlükəsizlik və diplomatiya məsələləri, o cümlədən Tayvan boğazındakı vəziyyət və Rusiyanın Ukraynaya müdaxiləsi fonunda ABŞ və Çin arasında gərginlik barədə müzakirələri yekunlaşdırıblar.

Publika.az xəbər verir ki, bu barədə "Amerikanın Səsi" bildirib.

Yanvarın 6-da Tayvanda Amerika İnstitutu tərəfindən təşkil olunmuş məsləhətləşmələrdən sonra ABŞ və Tayvan nümayəndələri arasında yüksək səviyyəli əhəmiyyətli görüşlər baş tutub.

Tayvandakı Amerika İnstitutu 1979-cu il tarixli Tayvan Münasibətləri Aktı əsasında ABŞ-ın Tayvanla bağlı siyasətinin həyata keçirilməsinə cavabdehdir, çünki ABŞ Tayvanla rəsmi əlaqələr saxlamır.

Ağ Evin milli təhlükəsizlik müşavirinin müavini Con Finer, dövlət katibinin müavini Vendi Şerman və digər ABŞ rəsmiləri Tayvanın milli təhlükəsizlik müşaviri Vellinqton Koo və Tayvanın xarici işlər naziri Cozef Vunun başçılıq etdiyi nümayəndə heyəti ilə bir neçə saatlıq görüşüblər.

ABŞ rəsmiləri Vaşinqtonun uzunmüddətli siyasətinin dəyişməz qaldığını bildirib, lakin çərşənbə axşamı danışıqlar faktını təsdiq və ya təkzib etməyib.

Dövlət Departamentinin sözçüsü Ned Prays deyib: “Mən heç bir konkret görüş barədə şərh verə bilmərəm, lakin deyə bilərəm ki, biz Tayvanla güclü qeyri-rəsmi əlaqələr saxlayırıq və Tayvanla uzunmüddətli siyasətimizə uyğun olaraq əlaqələrimizi davam etdiririk”.

Ayşən