Əsədin sərvəti uğrunda mübarizə: məhkəmə yolu ilə alacaqlar

Suriyada Əsəd rejiminin çökməsi ilə yarım əsrdir ölkəni idarə edən ailənin gizlətdiyi milyardlarla dollarlıq nağd pul və daşınmaz əmlak üçün qlobal "ov" başlanacaq.

Publika.az xəbər verir ki, Əsəd ailəsi Hafiz Əsədin 1970-ci ildə hakimiyyəti ələ keçirməsindən sonra onilliklər ərzində geniş investisiya şəbəkəsi qurub.

Rəsmilərin “WSJ”yə verdiyi məlumata görə, onun sərvətinə Rusiyadakı birinci dərəcəli daşınmaz əmlak, Avstriyadakı butik hotellər və Dubaydakı şəxsi təyyarə daxildir.

Ailənin sərvətinin dəqiq ölçüsü məlum deyil. ABŞ Dövlət Departamentinin 2022-ci il hesabatına görə, onların sərvəti ən azı 1 milyard, ən çoxu isə 12 milyard dollar dəyərində ola bilər. İnsan haqları qrupları Əsəd ailəsinin böyük sərvətinin arxasınca məhkəmə yolu ilə getməyə hazırlaşır.

Lakin böyük miqdarda aktivlərin Rusiya və Birləşmiş Ərəb Əmirliklərində yerləşdiyini nəzərə alsaq, bu işlərin nəticə verməsinin illər çəkə biləcəyi təxmin edilir. Britaniya mətbuatında çıxan xəbərlərə görə, Bəşər Əsədin də Londonda dondurulmuş bank hesabında 69,4 milyon dollar var.

Aysel Şahmar