Bu ölkədən Əsma Əsədə ömürlük giriş qadağası - Şok çağırış

Britaniya Suriyanın devrilmiş lideri Bəşər Əsədin həyat yoldaşı Əsma Əsədin ölkəyə qayıtması planlarından narahatdır. Çağırış edilib ki, ikili vətəndaşlığı olan Əsma Əsəd İngiltərəyə dönəcəyi təqdirdə pasportu ləğv edilsin.

Publika.az xəbər verir ki, Böyük Britaniyanın ədliyyə naziri Robert Cenrik Bəşər Əsədin həyat yoldaşının İngiltərədə dəbdəbəli həyatına qayıtmasının milyonlarla qurbana təhqir olacağını bildirib.

Bu ay Suriyada rejimin devrilməsindən sonra Rusiyaya sığınan Əsəd cütlüyü haqqında təəccüblü iddialar səsləndirilib. 49 yaşlı Əsma Əsədin xərçəng müalicəsi üçün İngiltərəyə qayıtmağı planlaşdırdığı bildirilir.

“Sanksiyaya məruz qalan biri kimi o, ölkədə xoş qarşılanmayacaq”, - xarici işlər naziri Devid Lemmi qeyd edib.

Londonda doğulub böyüyən və uğurlu bankçılıq karyerasına malik Əsma Əsəd 2000-ci ildə Bəşər Əsədlə evlənib. 2012-ci ildə Aİ-nin sanksiyaları çərçivəsində İngiltərədəki aktivləri dondurulan Əsma Əsədə qarşı 2021-ci ildə Suriyada hərbi cinayətlərdə iştirak etdiyi iddiası ilə istintaq başladılıb.

Aysel Şahmar