ABŞ-a qarşı ittifaq: Putin və Si Cinpin Trampa bu mesajı verdilər

Donald Trampın ABŞ-da vəzifəsinin icrasına başlamasından 12 saat keçməmiş Rusiya lideri Vladimir Putin Çin sədri Si Cinpinlə görüşərək Vaşinqtona qarşı ittifaqda olduqlarını göstəriblər.

Publika.az xəbər verir ki, görüş videokonfrans formatında keçirilib.

“ABŞ-ın yeni administrasiyası ilə bərabərhüquqlu dövlətlər arasında qarşılıqlı hörmət və dialoq qurmağa hazırıq”, - liderlər bəyan edib.

Putin açıqlamasında bu sözləri deyib: “Rusiya və Çin xarici ölkələrin daxili inkişaflarından və idarəetmə dəyişikliklərindən asılı olmayaraq, dünyanı daha ədalətli və çoxqütblü bir yerə çevirmək üçün birlikdə hərəkət etməyə davam edəcəklər. Biz Birləşmiş Millətlər Təşkilatı və onun Təhlükəsizlik Şurası, həmçinin BRİKS və digər beynəlxalq platformalar çərçivəsində ümumi yanaşmalarımızı davam etdirəcəyik”.

Putinin xarici siyasət üzrə müavini Yuri Uşakov iki liderin görüşünün əvvəlcədən planlaşdırıldığını və liderlərin bir-birlərinin yeni ilini təbrik etmək niyyətində olduqlarını desə də, Ukrayna müharibəsi məsələsinin də bu günlərdə gündəmə gətirildiyini etiraf edib.

Aysel Şahmar