Fransa şirkətinin dəhşətli cinayətlərdə əli var? - 150 nəfərdən yalnız 26-ı sağ qalıb

Almaniyanın insan haqları üzrə QHT-si Fransanın enerji nəhəngi "Total Energies"ə qarşı “hərbi cinayətlərdə, işgəncədə və məcburi yoxa çıxmalarda şəriklik” ittihamı ilə şikayət verib.

Publika.az "Euronews"a istinadla xəbər verir ki, Mozambikdə "TotalEnergies"in LNG layihəsini mühafizə edən əsgərlər onlarla mülki şəxsi metal konteynerlərdə saxlayıb, onların çoxu işgəncəyə məruz qalıb, yoxa çıxıb və ya edam edilib. "Total" isə Mozambik hakimiyyətindən araşdırma aparılmasını xahiş edib.

Qrupun bəyanatında bildirilir ki, bu, şirkətin Mozambikdəki Birgə Tapşırıq Qüvvəsinə maliyyə və maddi dəstək göstərməsi ilə bağlıdır.

“Enerji şirkəti birbaşa maliyyələşdirmə və maddi dəstək yolu ilə Mozambik silahlı qüvvələrindən ibarət Birgə Tapşırıq Qüvvəsini dəstəkləməkdə ittiham olunur”, – Avropa Konstitusiya və İnsan Haqları Mərkəzinin (ECCHR) açıqlamasında qeyd olunub.

Bildirilib ki, Fransanın Milli Antiterror Prokurorluğuna (PNAT) da şikayət təqdim edilib.

İddianın mərkəzində “konteyner qətliamı” dayanır. İddialara görə, "Total" tərəfindən maliyyələşdirilən əsgərlər 2021-ci ilin iyul-sentyabr ayları arasında şirkətin qaz sahəsində onlarla mülki şəxsi saxlayıb və işgəncə veriblər. Təxminən 150 nəfərdən yalnız 26 nəfərin sağ qaldığı bildirilir.

Birgə Tapşırıq Qüvvəsi 2020-ci ildə "Total"ın Mozambikdəki törəmə şirkəti ilə hökumət arasında imzalanmış memorandum əsasında yaradılıb. Bu qüvvə Fransız şirkətinin LNG layihəsini qorumaq üçün nəzərdə tutulmuş təhlükəsizlik bölməsi idi.

Razılaşmaya əsasən, şirkət bölməyə yaşayış, ərzaq, avadanlıq və əsgərlərə bonuslar da təqdim edib. ECCHR qeyd edir ki, bu dəstək şirkətin sistematik insan haqları pozuntularından xəbərdar olmasına baxmayaraq davam etdirilib.